پاکستان میں ای سگریٹ استعمال کرنے والوں کی تعداد 12 لاکھ سےمتجاوز

اسلام آباد( قاسم عباسی )گیلپ پاکستان کے ایک نئے قومی سروے کے مطابق، ملک میں ای سگریٹ یا ویپنگ ڈیوائسز استعمال کرنے والوں کی تعداد کا تخمینہ 12 لاکھ سے زائد لگایا گیا ہے—حالانکہ عوام میں ان مصنوعات کے بارے میں آگاہی اب بھی نسبتاً کم ہے۔اس مطالعے میں ویپنگ اور چبانے والے تمباکو کی مصنوعات کے بارے میں عوامی آگاہی، تاثرات اور خدشات کا بجائزہ لیا گیا۔ نتائج کے مطابق پاکستان میں 17 فیصد بالغ افراد نے الیکٹرانک سگریٹ یا ویپنگ کے بارے میں سنا ہے۔چبانے والے تمباکو (جیسے زردہ، اسنَس اور نکوٹین پاوچز) کے بارے میں آگاہی 20 فیصد رہی، جبکہ شہری اور خوشحال طبقے میں یہ واقفیت نمایاں طور پر زیادہ پائی گئی۔گیلپ کے مطابق اگرچہ مجموعی طور پر آگاہی محدود ہے، لیکن صارفین کی اندازاً تعداد ظاہر کرتی ہے کہ ویپنگ پاکستان میں ایک چھوٹا مگر تیزی سے بڑھتا ہوا رجحان ہے—خاص طور پر اس بات کو مدنظر رکھتے ہوئے کہ یہ مصنوعات حال ہی میں ملک میں متعارف ہوئی ہیں۔