رمضان کارڈ اور دسترخوان حکومت کے عوام دوست اقدامات ہیں،چوہدری افتخار نذیر

جہانیاں ( نامہ نگار ) حکومت پنجاب کی ہدایت پر سیاسی قیادت اور ضلعی انتظامیہ ترقیاتی عمل کو آگے بڑھانے کیلئے پرعزم ہے جب کہ ڈسٹرکٹ کوآرڈینیشن کمیٹی کے اجلاس میں نگہبان رمضان پیکیج، لا اینڈ آرڈر اور ڈویلپمنٹ پیکیج کا جائزہ لیا گیا، اجلاس کی صدارت چئیرمین و ایم این اے چوہدری افتخار نذیر نے ڈپٹی کمشنر ملیحہ رشید کے ہمراہ کی، جس میں ایم این اے محمد خان ڈاہا، ایم پی اے چوہدری ضیاء الرحمٰن، ڈی پی او اسماعیل کھاڑک اور دیگر افسران نے شرکت کی، اجلاس میں چیئرمین چوہدری افتخار نذیر کو پنجاب ڈویلپمنٹ پروگرام اور پنجاب سٹیج پروگرام کے حوالے سے بھی آگاہ کیا گیا، اس موقع پر چوہدری افتخار نذیر کا کہنا تھا کہ وزیر اعلیٰ پنجاب مریم نواز کی ہدایات کی روشنی میں تعمیر و ترقی کا سفر کامیابی سے جاری ہے اور نگہبان رمضان کارڈ و دسترخوان حکومت پنجاب کے عوام دوست اقدامات ہیں، منصوبوں کیلئے دستیاب فنڈز کو موثر انداز میں استعمال کیا جائے ۔ ڈپٹی کمشنر ملیحہ رشید نے کہا کہ وزیر اعلیٰ پنجاب کی ہدایت پر ضلع بھر میں بیوٹیفکیشن کے کاموں پر خصوصی فوکس ہے جبکہ ماہ رمضان میں شہریوں کو ریلیف فراہم کرنے کیلئے بھرپور اقدامات کئے جائیں گے۔