مزدوروں کو حاصل شدہ حقوق غصب ہو چکے،ریلی سے رہنمائوں کا خطاب

کراچی (اسٹاف رپورٹر) نیشنل ٹریڈ یونین فیڈریشن پاکستان،ہوم بيسڈوویمن ورکرز فیڈریشن اور دیگر تنظیموں کے زیراہتمام اتوار کو مزدور ریلی کا انعقاد ہوا جس کی قیادت ریاض عباسی ، کامریڈ زہرا خان اور اسد اقبال بٹ کر رہے تھے، ریلی میں مختلف شعبوں سے تعلق رکھنے والے مزدوروں، سیاسی ، سماجی و انسانی حقوق کی تنظیموں کے نمائندوں کی کثیر تعداد نے شرکت کی، ناصر منصور جنرل سیکریٹری نیشنل ٹریڈ یونین فیڈریشن نے ریلی سے خطاب کرتے ہوئے کہا کہ مزدوروں کو حاصل شدہ حقوق غصب ہو چکے، مزدوروں کو جائز مطالبات کے لیے آواز اٹھانے کی پاداش میں دیوار سے لگانے کی سرمایہ دارانہ روش صنعتی و معاشی ترقی کے راستے میں سب سے بڑی رکاوٹ ہے ، انہوں نے مزید کہا کہ سرمایہ داروں اور پولیس کا مزدور دشمن گٹھ جوڑ مزدوروں میں شدید بے چینی اور صنعتی امن کو خطرے میں ڈال رہا ہے،ہیومن رائٹس کمیشن پاکستان کے چیئرپرسن اسد اقبال بٹ،کامریڈ زہرا خان جنرل سیکرٹری ہوم بیسڈویمن ورکرز فیڈریشن نے بھی اپنے خیالات کا اظہار کیا ۔