بلوچستان میں نیا مغربی موسمی نظام داخل، کوئٹہ، مستونگ اور ژوب میں شدید بارش کا امکان

کوئٹہ(پی پی آئی)بلوچستان میں نیا مغربی موسمی نظام داخل، کوئٹہ ،مستونگ اور ژوب میں شدید بارش کا امکان ہے، کچھی، آواران، کوہلو اور لسبیلہ کے اضلاع میں موسم جزوی اور کہیں مکمل ابر آلود رہنے کا امکان ہےجبکہ محکمہ موسمیات کی جانب سے گرج چمک، تیز ہواؤں اور بعض علاقوں میں ژالہ باری کی وارننگ جاری کی گئی ہے۔ محکمہ موسمیات کوئٹہ ریجنل سینٹر کی رپورٹ کے مطابق موسمی نظام کے اتوار کی شام بلوچستان میں داخل ہونے کی پیش گوئی کی گئی تھی اور توقع ہے کہ یہ منگل کی رات تک مکران، رخشان، قلات، کوئٹہ، لورالائی، سبی، نصیر آباد اور ژوب ڈویژنوں پر اثر انداز ہوگا۔ آئندہ 24 گھنٹوں کے لیے، محکمہ موسمیات کے حکام نے صوبے کے بیشتر علاقوں میں موسم بنیادی طور پر سرد اور ابر آلود رہنے کی پیش گوئی کی ہے۔ تاہم رات کے وقت چاغی، قلات، نوشکی، مستونگ، کوئٹہ، چمن، پشین اور قلعہ عبداللہ جیسے اضلاع میں گرج چمک کے ساتھ ہلکی سے درمیانی بارش اور تیز ہواؤں کا امکان ہے۔ اگلے 48گھنٹوں کی پیش گوئی میں ہلکی سے درمیانی بارش اور گرج چمک کے امکان کو وسیع علاقے تک بڑھا دیا گیا ہے۔