کرکٹ میں گرانقدر خدمات پر سری لنکن حکام کا محسن نقوی کو خراج تحسین

کراچی (اسٹاف رپورٹر) پاکستان کرکٹ بورڈ کے چیئر مین محسن نقوی کے اعزاز میں سری لنکا کرکٹ کی جانب سے خصوصی تقریب کا اہتمام کیا گیا اور کھیل کے فروغ کیلئے گراں قدر خدمات پر خراج تحسین پیش کیا گیا۔ اس موقع پر سری لنکا کرکٹ کے صدر شامئے سلوا ، سری لنکن وزیر کھیل سنیل سناوی، سیکرٹری دفاع سمپاتھ تویا کونتھسے، چیف ایگزیکٹو آفیسر سری لنکا کرکٹ ایشلے ڈی سلوا، سجیوا گوڈالیاڈا اور متعلقہ حکام بھی اس موقع پر موجود تھے۔ محسن نقوی نے کہا کہ کرکٹ جنٹلمین کھیل کے ساتھ محبت اور قربتیں بڑھانے کا ذریعہ ہے۔ وفاقی وزیر اوورسیز پاکستانیز چوہدری سالک حسین ،چیف آپریٹنگ آفیسر پی سی بی سمیر احمد اور چیف ایگزیکٹو آفیسر پی ایس ایل سلمان نصیر بھی ملاقات میں شریک تھے۔ دونوں کرکٹ بورڈز نے کرکٹ کے فروغ کیلئے باہمی تعاون بڑھانے کے عزم کا اعادہ کیا گیا۔ دریں اثنا بورڈ چیف نے کولمبوکے ہوٹل میں پاکستانی کرکٹرز اور ٹیم مینجمنٹ سے ملاقات کی اور کھلاڑیوں کا حوصلہ بڑھایا اور عزم وجذبے کو سراہا۔کپتان سلمان آغا، ہیڈ کوچ مائیک ہیسن، منیجر نوید اکرم چیمہ سمیت تمام کھلاڑی اور کوچنگ اسٹاف ملاقات میں موجود تھے۔ پریما داسا اسٹیڈیم میں انہوں نے پاک بھارت میچ دیکھا اور تماشائیوں سے بھی ملے۔