اداکار دانش تیمور کی سالگرہ پر جیو کا شاندار تحفہ، ڈرامہ سیریل ’’ہمراہی‘‘

کراچی (جنگ نیوز) پورے برصغیر میں کروڑوں دِلوں پر اپنی اداکاری کی وجہ سے راج کرنے والے دانش تیمور پیر 16فروری کو اپنی سالگرہ منا رہے ہیں۔ اس خوشی کو دوبالا کرنے کیلئے ”جیو“ اُن کے پرستاروں کیلئے ایک زبردست تحفہ لارہا ہے۔ محبت کی لازوال داستان ”ہمراہی“ جس کے ہیرو تو برتھ ڈے بوائے دانش تیمور ہیں اور اُن کے ساتھ ہیں حبہ بخاری۔ یہ جوڑی اسکرین پر خوب سج رہی ہے۔ ڈرامے کو جیو اور معروف ہدایتکار بابر جاوید نے مشترکہ طور پر تخلیق کیا جبکہ اس کی متاثر کن اور جذبات سے بھرپور تحریر زنجبیل عاصم کے قلم کا شاہکار ہے جو بہت جلد ”جیوٹی وی“ کے اسکرین کی زینت بنے گا۔ سال کی سب سے بڑی لو اسٹوری میں اظفر رحمان، حاجرہ یامین اور شیز سجاد گل جیسے باصلاحیت اداکار بھی شامل ہیں، جن کی موجودگی کہانی کو مزید مضبوط بنائے گی۔