پاکستانی کپتان، کوچ ،کھلاڑی بدلے نہ بھارت سے میچ کا نتیجہ

کراچی (اسٹاف رپورٹر) پاکستانی کرکٹ ٹیم روایتی حریف بھارت کے خلاف میچ جیت کر شائقین کو خوشیاں نہ دے سکی۔ چار ماہ میں بھارت نے پاکستان کے خلاف چوتھا ٹی ٹوئنٹی انٹر نیشنل میچ جیت لیا۔ چاروں میچوں میں کپتان سلمان آغا اور ہیڈ کوچ مائیک ہیسن تھے اور ٹیم کے تمام کھلاڑی یہی تھے۔ آئی سی سی ایونٹ میں بھارت نے پاکستان کے خلاف برتری قائم رکھی۔ میچ سے قبل پاکستان کے سابق کپتان وسیم اکرم اور بھارت کے سابق کپتان روہت شرما ٹرافی کے ساتھ میدان میں آئے۔ دنیا بھر سے پاکستانی مہنگے ٹکٹ خرید کر میچ دیکھنے آئے تھے ۔ پاکستان نے چھٹی والے دن میچ دیکھنے کے لئے پکنک والے انداز میں تیاری کررکھی تھی لیکن ان کی خوشیاں مانند پڑ گئیں، انہیں مایوس انداز میں لوٹنا پڑا جبکہ بھارتی تماشائی ڈھول تاشوں کے ساتھ جیت کا جشن مناتے ہوئے رخصت ہوئے۔ بولنگ میں نہ شاہین چلے اور نہ شاداب اور ابرار احمد کا جادو چل سکا۔ بابر اعظم کو کھلانے کا فیصلہ کارگر ثابت نہ ہوسکا۔ بابر کے ساتھ سلمان آغا، صائم ایوب ،شاداب خان ، صاحبزادہ فرحان اور نواز بھی ناکام رہے۔ بھارتی اسپنر نے پاکستان سے بہتر بولنگ کی ۔ عثمان خان کے علاوہ کوئی بیٹر بڑی اننگز نہ کھیل سکا۔ مسلسل تیسرے میچ میں کپتان نے فہیم اشرف کو بولنگ نہیں دی۔