پنجاب، رمضان سے قبل گھی اور کوکنگ آئل کی قیمتوں میں کمی کا اعلان

جڑانوالہ ( آ ن لائن ) رمضان المبارک کی آمد سے قبل عوام کیلئے خو شخبری، حکومتی ہدایت پر گھی اور کوکنگ آئل کی قیمتوں میں نمایاں کمی کا اعلان کر دیا گیا۔ ڈی جی فوڈ اتھارٹی عاصم جاوید سے پاکستان گھی ملز مالکان کی ایک اہم ملاقات ہوئی، جس میں رمضان المبارک کے دوران اشیائے خورونوش کی قیمتوں اور معیار پر تفصیلی تبادلہ خیال کیا گیا.ملاقات کے بعد وزیراعلی پنجاب کی معاون خصوصی سلمی بٹ نے میڈیا کو بتایا کہ حکومت نے فیصلہ کیا ہے کہ رمضان المبارک میں تمام برانڈز کے گھی اور کوکنگ آئل پر فی کلو یا فی لٹر پیکٹ کی قیمت میں 10 سے 16 روپے تک رعایت دی جائے گی۔ انہوں نے کہا کہ حکومت کی اولین ترجیح ہے کہ رمضان کے بابرکت مہینے میں عوام کو زیادہ سے زیادہ سہولت فراہم کی جائے، اس سلسلے میں صنعت کاروں نے بھی حکومت کے ساتھ تعاون کی یقین دہانی کرائی ہے تاکہ قیمتوں میں کمی کا فائدہ براہ راست صارفین تک پہنچ سکے۔ڈی جی فوڈ اتھارٹی عاصم جاوید کا کہنا تھا کہ ماہ رمضان میں ہر فرد تک معیاری اور رعایتی نرخوں پر گھی اور آئل کی فراہمی کو یقینی بنایا جائے گا۔