ملکی استحکام کیلئے ن لیگ سے تعاون کیا، ادھر ہم ادھر تم کا نعرہ محض اخباری سرخی تھا، صدر زرداری

وہاڑی(نمائندہ جنگ) صدر پاکستان آصف علی زرداری دو روزہ نجی دورے پر نواب شہزاد علی خان اور نواب شہریار علی خان کی رہائش گاہ شفقت پیلس پہنچے جہاں کارکنان، تاجروں اور وکلاء کے بڑے اجتماع سے خطاب کرتے ہوئے انہوں نے کہا کہ ملکی استحکام کیلئے ن لیگ سے تعاون کیا،ادھر ہم ادھر تم کا نعرہ محض اخباری سرخی تھا،بھٹو نے ملک کو ایٹمی طاقت بنایا، سیاست ہر شخص کے بس کا کام نہیں،طویل اسیری برداشت کی ،کبھی گھبرایا نہ بیماری سے پریشان ہوا،جیل غیرت سے کاٹی جاتی ہے، انہوں نے طویل اسیری برداشت کی مگر کبھی گھبرائے نہ بیماری پر پریشان ہوئے لوگ رونے لگ جاتے ہیں، انہوں نے کہا کہ ایک کھلاڑی صرف کھیل کے میدان میں اپنا بہترین کھیل پیش کر سکتا ہے، سیاست ہر شخص کے بس کا کام نہیں ہے انہوں نے کہا کہ پیپلز پارٹی کا واضح مؤقف ہے کہ کشمیر ہماری شہ رگ ہے اور اسے کبھی بھارت کا حصہ نہیں بننے دیا جائے گا، ہم نے ہمیشہ پاکستان کے مفاد کو مقدم رکھا، ذاتی سیاست کو ترجیح نہیں دی، ملکی استحکام کیلئے ن لیگ سے تعاون کیا اور ماضی میں خیبرپختونخوا میں اے این پی کا ساتھ دیا، ان کے ہمراہ سردار سلیم حیدر، ندیم افضل چن، ڈاکٹر عاصم حسین، عبدالقادر گیلانی اور نسیم احسن خان خاکوانی سمیت دیگر رہنما بھی موجود تھے، صدر نے کہا کہ زراعت ہی پاکستان کی ترقی کا واحد حل ہے، کسانوں کو ریلیف دینا ہوگا، پانی کی اہمیت پر زور دیتے ہوئے خبردار کیا کہ مستقبل میں پانی پر جنگیں ہوسکتی ہیں، بھارت نے ٹریلر دکھایا ہے اس لئے آبی وسائل کے درست استعمال کی حکمت عملی اپنانا ہوگی، لاہور کے پانی کو سیوریج زدہ قرار دیتے ہوئے دریائے راوی کے پانی کے استعمال اور ماحولیاتی بہتری کیلئے نیم کے درخت لگانے کی ضرورت پر زور دیا، انہوں نے کہا کہ ذوالفقار علی بھٹو نے ملک کو ایٹمی طاقت بنایا، ادھر ہم ادھر تم کا نعرہ محض اخباری سرخی تھا، اگر پاکستان ایٹمی قوت نہ بنتا تو آج ہمارا حال نیپال جیسا ہوتا، بے نظیر بھٹو کے دور میں میزائل پروگرام کو تقویت ملی اور آج دفاع ناقابل تسخیر ہے، نواب شہزاد علی خان کی جانب سے وہاڑی میں یونیورسٹی کے قیام کے اعلان کو خوش آئند قرار دیتے ہوئے تعاون کی یقین دہانی کرائی، اس موقع پر گورنر پنجاب نے صدر کے جنوبی پنجاب کے دورے کو جمہوری استحکام کیلئے اہم قرار دیا جبکہ نواب شہزاد علی خان نے اعلان کیا کہ ان کی والدہ 10 ایکڑ اراضی یونیورسٹی کیلئے وقف کر رہی ہیں، ایک ارب روپے کی لاگت سے جدید جامعہ قائم کی جائے گی جہاں مفت تعلیم اور سی ایس ایس کی تیاری کی سہولت فراہم کی جائے گی۔