ایران ، بڑی قیادت کے خاتمے کا امکان نہیں، 18 امریکی انٹیلی جنس ایجنسیوں کی رپورٹ

واشنگٹن(نیوزڈیسک) ایک خفیہ امریکی انٹیلی جنس رپورٹ میں کہا گیا ہے کہ وسیع پیمانے پر فوجی کارروائی کے باوجود ایران کی موجودہ حکمران قیادت کے خاتمے کا امکان نہیں ہے۔واشنگٹن پوسٹ کے صحافی جوناتھن ہڈسن نے ایکس پر اپنی ایک پوسٹ میں بتایا گیا ہے کہ امریکا کی 18 انٹیلی جنس ایجنسیوں کی مشترکہ رپورٹ میں بتایا گیا ہے کہ بڑے پیمانے پر امریکی فوجی حملہ بھی ایران کے مضبوط فوجی اور مذہبی حکومتی ڈھانچے کو گرانے میں کامیاب نہیں ہو سکے گا۔انٹیلی جنس تجزیہ کاروں کے مطابق ایران کے نظام میں قیادت کے تسلسل کو برقرار رکھنے کے واضح طریقہ کار موجود ہیں، جن میں نئے رہنما کے انتخاب کا عمل اسمبلی آف ایکسپرٹس کے ذریعے طے کیا جاتا ہے جبکہ نظام کو اسلامی انقلابی گارڈ کور کی حمایت بھی حاصل رہتی ہے۔یہ رپورٹ اس وقت سامنے آئی جب ڈونلڈ ٹرمپ انتظامیہ نے ایران کے خلاف فوجی کارروائی کے بعد اس کے سیاسی نظام میں تبدیلی کی توقع ظاہر کی تھی۔ تاہم انٹیلی جنس حکام کا کہنا ہے کہ فی الحال ایران کے اندر ایسی کوئی بڑی بغاوت یا داخلی تقسیم نظر نہیں آ رہی جو حکومت کے فوری خاتمے کا سبب بن سکے۔