ٹرمپ کی ایران جنگ نے عالمی معیشت اور سرمایہ کاری کو ہلا ڈالا

نیویارک (نیوز ڈیسک) ٹرمپ کی ایران جنگ نے عالمی معیشت اور سرمایہ کاری کو ہلا ڈالا، عالمی منڈیوں میں تیز اتار چڑھاؤ، ایندھن قیمتوں میں اضافے سے مہنگائی کا طوفان آیا ہوا ہے۔ روایتی محفوظ سرمایہ کاری بھی غیر یقینی کا شکار، سرمایہ کار نقد رقم کے ذخائر بڑھانے لگے۔ برطانوی خبر رساں ادارے کی رپورٹ کے مطابق ٹرمپ کی ایران کے ساتھ جاری جنگ عالمی مالیاتی منڈیوں میں شدید اتار چڑھاؤ پیدا کر رہی ہے اور ماہرین کا کہنا ہے اس کے اثرات عام لوگوں کی مالی حالت اور سرمایہ کاری پر بھی پڑ سکتے ہیں۔ توانائی کی قیمتوں میں ممکنہ اضافے سے مہنگائی اور معاشی ترقی متاثر ہونے کا خدشہ ہے جبکہ سرمایہ کار اپنے اثاثوں کی تقسیم پر دوبارہ غور کر رہے ہیں۔ رپورٹ کے مطابق روایتی محفوظ سرمایہ کاری جیسے امریکی سرکاری بانڈز اور سونا بھی اس بار مکمل تحفظ فراہم نہیں کر رہے، جس کے باعث بہت سے سرمایہ کار غیر یقینی صورتحال میں نقد رقم کے ذخائر بڑھانے کو ترجیح دے رہے ہیں۔ ماہرین کا کہنا ہے کہ اگر مشرق وسطیٰ میں کشیدگی برقرار رہی تو عالمی معیشت اور مالیاتی منڈیوں پر اس کے اثرات مزید گہرے ہو سکتے ہیں۔