ایران جنگ کا ایک ہفتہ، امریکا اور ٹرمپ کیلئے خطرات بڑھنے لگے

واشنگٹن (نیوز ڈیسک) ایران کے خلاف امریکا اور اسرائیل کی جنگ کے ایک ہفتہ بعد امریکا اور ٹرمپ کے لیے خطرات بڑھنے لگے۔ جنگ پھیل کر خطے بھر میں بڑے تنازع کی شکل اختیار کر گئی، آبنائے ہرمز میں کشیدگی سے عالمی معیشت کو خطرہ، امریکی ہلاکتیں اور معاشی دباؤ ٹرمپ کے لیے سیاسی چیلنج،آئندہ وسط مدتی انتخابات پر بھی اثرات پڑیں گے ۔ برطانوی خبر رساں ادارے کے مطابق ایران کے خلاف امریکا اور اسرائیل کی جنگ کو ایک ہفتہ گزرنے کے بعد صدر ڈونلڈ ٹرمپ کو بڑھتے ہوئے فوجی، معاشی اور سیاسی خطرات کا سامنا ہے، کیونکہ تنازع تیزی سے خطے کی بڑی جنگ میں تبدیل ہو رہا ہے۔ اگرچہ ایرانی سپریم لیڈر آیت اللہ علی خامنہ ای کی ہلاکت اور ایرانی فوجی تنصیبات پر شدید حملوں کو امریکا کی بڑی کامیابی قرار دیا جا رہا ہے، لیکن ایران کی جوابی کارروائیوں، حزب اللہ کی دوبارہ لڑائی میں شمولیت اور آبنائے ہرمز میں تیل کی ترسیل رکنے کے خدشات نے صورتحال کو پیچیدہ بنا دیا ہے۔ ماہرین کے مطابق اگر جنگ طویل ہوئی، امریکی فوجی ہلاکتیں بڑھیں اور توانائی کی قیمتوں میں اضافہ جاری رہا تو اس کے اثرات نہ صرف عالمی معیشت بلکہ امریکا کی داخلی سیاست اور نومبر میں ہونے والے وسط مدتی انتخابات پر بھی پڑ سکتے ہیں۔