ملتان ڈویژن‘رمضان المبارک میں گراں فروشی پر 96لاکھ روپے کے جرمانے

ملتان (سٹاف رپورٹر) ملتان ڈویژن میں رمضان ریلیف اقدامات جاری ہیں اور حکام کے مطابق پرائس کنٹرول، رمضان دسترخوان اور نگہبان رمضان پروگرام کے تحت مستحقین کو ریلیف فراہم کیا جارہا ہے جبکہ گرانفروشی کیخلاف سخت کارروائیاں بھی عمل میں لائی جارہی ہیں، کمشنر عامر کریم خاں کا کہنا ہےکہ ملتان ڈویژن میں 183پرائس کنٹرول مجسٹریٹس متحرک ہیں جنہوں نے 19 فروری سے 14 مارچ تک مجموعی طور پر 2 لاکھ ایک ہزار 566 انسپکشنز کیں، اس دوران گراںفروشی پر 96 لاکھ 16 ہزار روپے جرمانے عائد کئے گئے جبکہ 9 مقدمات درج کئے گئے،انہوں نے مزید بتایا کہ گراںفروشی میں ملوث 99 افراد کو گرفتار کیا گیا اور 45 دکانیں سربمہر کی گئیں،رمضان المبارک میں مستحق اور روزہ دار افراد کو سہولت فراہم کرنے کیلئے ملتان ڈویژن میں 34 رمضان دسترخوان قائم کئے گئے ہیں جہاں اب تک 2 لاکھ 63ہزار 295 افراد افطار سے مستفید ہو چکے ہیں، انہوں نے مزید بتایا کہ نگہبان رمضان پروگرام کے تحت ملتان ڈویژن میں 4 لاکھ 60 ہزار 383 نگہبان کارڈز تقسیم کئے گئے ہیں جبکہ ان کارڈز کے ذریعے مستحقین میں مجموعی طور پر 4ارب 60 کروڑ 38 لاکھ 30 ہزار روپے کی رقم فراہم کی جاچکی ہے۔