مزید کفایت شعاری اور ایندھن بچت اقدامات اور ان کی مانیٹرنگ کا نوٹیفکیشن جاری

اسلام آباد ( رانا غلام قادر)وزیر اعظم شہباز شریف کی زیرصدارت ہو نے والے اجلاس کے فیصلہ کی روشنی میں کابینہ ڈویژن نے مزید کفایت شعاری اور ایندھن بچت اقدامات اور ان کی مانیٹرنگ کا باضابطہ نوٹیفکیشن جاری کر دیا ،انٹیلی جنس بیورو فیول الاٹمنٹ میں 50 فیصد کمی اور 60 فیصد سرکاری گاڑیاں کھڑی کرنے کے فیصلے کا جامع آڈٹ کرے گا۔انٹیلی جنس بیورو ہفتہ وار رپورٹ وزیر اعظم اور مانیٹرنگ کمیٹی کو پیش کرے گا،مالی بچت کو وزیر اعظم آَسٹیریٹی فنڈ 2026 میں منتقل کرنے کیلئے ذیلی کمیٹی قائم کر دی گئی ۔، نو ٹیفکیشن کے تحت اسٹیٹ اونڈ انٹرپرائزز، خودمختار و قانونی اداروں، ریگولیٹری اتھارٹیز کی اعلیٰ انتظامیہ کی تنخواہوں میں دو ماہ کیلئے کٹوتی ہو گی،چیف ایگزیکٹو افسران، ایگزیکٹو ڈائریکٹرز، ڈائریکٹرز اور سینئر مینیجرز کی مجموعی تنخواہ سے کٹوتی کا اطلاق ہوگا،تین لاکھ سے دس لاکھ روپے مجموعی تنخواہ پر دو ماہ کیلئے 5 فیصد کٹوتی کی جائے گی،دس لاکھ ایک روپے سے بیس لاکھ روپے تک مجموعی تنخواہ پر 15 فیصد کٹوتی ہو گی ،بیس لاکھ ایک روپے سے تیس لاکھ روپے تک مجموعی تنخواہ پر 25 فیصد کٹوتی نافذ ہو گی،تیس لاکھ روپے سے زائد مجموعی تنخواہ پر دو ماہ کیلئے 30 فیصد کٹوتی ہوگی ،تنخواہوں سے کٹوتی کی تمام رقم وزیر اعظم آَسٹیریٹی فنڈ 2026 میں جمع کرائی جائے گی ،سرکاری اداروں، خودمختار و قانونی اداروں اور اسٹیٹ اونڈ انٹرپرائزز کے بورڈز میں حکومتی نامزد ارکان کی 100 فیصد بورڈ فیس کٹوتی ہو گی۔