ٹرمپ فتح کا اعلان کرنا چاہتے ہیں، مگر ایران کے پاس اب بھی کئی طاقتور کارڈ موجود

کراچی (نیوز ڈیسک) صدر ٹرمپ فتح کا اعلان کرنے کے خواہاں ہیں مگر ایران کے پاس اب بھی کئی طاقتور کارڈ موجود ہیں۔ دو ہفتوں کی جنگ میں امریکا و اسرائیل نے ایران کو شدید نقصان پہنچایا، ہرمز اور تیل سپلائی ایران کے ہاتھ میں اہم ہتھیار ہے۔ اس کے علاوہ تہران کے پاس یورینیم کے ذخیرے اور خطے میں حملوں کی صلاحیت جنگ کے خاتمے کو پیچیدہ بنا رہی ہے۔ امریکی اخبار واشنگٹن پوسٹ کے مطابق صدر ڈونلڈ ٹرمپ ایران کے خلاف جاری جنگ میں جلد فتح کا اعلان کرنا چاہتے ہیں، لیکن شدید نقصان اٹھانے کے باوجود ایران کے پاس اب بھی ایسے اہم ذرائع موجود ہیں جو جنگ کے خاتمے کو پیچیدہ بنا سکتے ہیں۔ دو ہفتوں کی شدید لڑائی میں امریکہ اور اسرائیل نے ایران کی بحریہ، میزائل نظام اور کئی اعلیٰ فوجی رہنماؤں کو نشانہ بنایا ہے، تاہم ماہرین کے مطابق ایران اب بھی خلیج کے اہم بحری راستوں خصوصاً آبنائے ہرمز کے ذریعے عالمی تیل کی سپلائی کو متاثر کرنے کی صلاحیت رکھتا ہے۔