NCCIAدفترکیلئے پی سی ایس ٹی کی عمارت خالی کرنیکی ہدایت

اسلام آباد (ساجد چوہدری )NCCIA دفترکیلئے پی سی ایس ٹی کی عمارت خالی کرنیکی ہدایت ،وزیراعظم کیطرف سے منظور کردہ سمری وزارت سائنس و ٹیکنالوجی کو موصول ہو گئی۔نیشنل سائبر کرائم انویسٹی گیشن ایجنسی (این سی سی آئی اے) کا ہیڈ آفس وزارت سائنس و ٹیکنالوجی کے ذیلی ادارے پاکستان کونسل آف سائنس اینڈ ٹیکنالوجی (پی سی ایس ٹی )کی شاہراہ دستور سے منسلک سڑک پرموجود عمارت میں قائم کرنے کا فیصلہ کیا گیا ، وزارت سائنس و ٹیکنالوجی کے ذرائع کا کہنا ہے کہ وزارت داخلہ کے ذریعے پی سی ایس ٹی کی عمارت میں این سی سی آئی اے کے دفترکے قیام کیلئے سمری وزیراعظم کو بھجوائی گئی تھی جس کی انھوں نے منظوری نے دیدی ، اس حوالے سے سمری وزارت سائنس و ٹیکنالوجی کو موصول ہو گئی ہے ، ادھر حکومت کے ایک فیصلے کے تحت پی سی ایس ٹی کو ختم کرنے کا فیصلہ پہلے ہی ہو چکا ہے تاہم وزارت سائنس و ٹیکنالوجی نے اس ادارے کی اہمیت کے پیش نظر اس کی بحالی کیلئے بھی سمری وزیراعظم کو بھجوا دی گئی ، پی سی ایس ٹی کے بعض افسران کا کہنا تھا کہ ہمیں کہا گیا کہ فوری طور پر دفتر کے دو فلور خالی کر دیئے جائیں تاکہ رینوویشن کا کام شروع ہوسکے، حالانکہ ادارے میں انتہائی اہم سامان پڑا ہوا ہے جو باہر رکھنے سے خراب ہو سکتا ہے جبکہ ادارے کی بحالی کی سمری بھی وزیراعظم کو وزارت سائنس و ٹیکنالوجی نے بجھوا رکھی ہے، تاہم سمری کیلئے متعلقہ شعبہ کے افسران سے رابطہ کیا گیا تو انہوں نے فون نہیں اٹھایا۔