اسرائیل، بھارت، یو اے ای اور صومالی لینڈ پر مشتمل نئی جیو پولیٹیکل صف بندی ابھر سکتی ہے، ایرانی سفیر

اسلام آباد (صالح ظافر)اسلام آباد میں ایران کے سفیر نے کہا ہے کہ جاری جنگ کے بعد اسرائیل، بھارت، متحدہ عرب امارات اور صومالی لینڈ پر مشتمل ایک نئی جیو پولیٹیکل صف بندی ابھر سکتی ہے، جنگ کے خاتمے پر پاکستان، سعودی عرب، ایران، ترکیہ اور مصر کے درمیان وسیع تر علاقائی تعاون کے امکانات ہیں۔ تفصیلات کےمطابق پاکستان میں ایران کے سفیر نے یاد دہانی کرائی ہے کہ ایران نے تمام پڑوسی ممالک کے ساتھ دوستانہ تعلقات استوار رکھے ہیں، تاہم انہوں نے اشارہ دیا کہ جاری جنگ امریکی اثر و رسوخ کو کمزور کر کے اور اسرائیل کو مزید تنہا کر کے علاقائی نظم و نسق کو تبدیل کر سکتی ہے۔ انہوں نے پیش گوئی کی ہے کہ اسرائیل، بھارت، متحدہ عرب امارات اور صومالی لینڈ پر مشتمل ایک نئی جیو پولیٹیکل صف بندی ابھر سکتی ہے، جبکہ دوسری جانب جنگ کے خاتمے کے بعد پاکستان، سعودی عرب، ایران، ترکیہ اور مصر کے درمیان وسیع تر علاقائی تعاون کے امکانات کی بھی پیش گوئی کی ہے۔ اسلام آباد میں سینٹر فار انٹرنیشنل اسٹریٹجک اسٹڈیز کے زیر اہتمام منعقدہ گول میز کانفرنس سے خطاب کرتے ہوئے، سفیر رضا امیری مقدم نے مشکل وقت میں ثابت قدمی سے تعاون کرنے اور واشنگٹن اور تہران کے درمیان مذاکرات میں سہولت کاری فراہم کرنے پر پاکستان کا شکریہ ادا کیا۔ انہوں نے کہا کہ تہران اپنے تمام پڑوسیوں میں اسلام آباد کے ساتھ تعلقات کو اولین ترجیح دیتا ہے۔ ایرانی سفیر نے یہ پیش گوئی بھی کی کہ امریکہ اور اسرائیل کے مابین جاری تنازع، جو کہ اب ایک نازک جنگ بندی کے مرحلے میں ہے، ختم ہونے کے بعد ایک نئی علاقائی صف بندی ابھرے گی۔