کراچی کی تباہی،ذمہ دارپیپلزپارٹی نہیں مسلط کرنیوالے بھی ہیں ،حافظ نعیم

کراچی (اسٹاف رپورٹر)امیر جماعت اسلامی پاکستان حافظ نعیم الرحمٰن نے کہا ہے کہ پیپلز پارٹی کراچی کے 3360ارب روپے ہڑپ کرچکی ہے۔کراچی کی تباہی کی ذمہ دار صرف پیپلزپارٹی نہیں بلکہ وہ قوتیں بھی ہیں جنہوں نے کرپٹ اور نااہل لوگوں کو عوام پر مسلط کیا۔ جن عناصر نے ایسے لوگوں کو اقتدار میں پہنچایا، وہ بھی عوام کے سامنے جوابدہ ہیں۔وہ جناح ٹاؤن کے تحت شرف آباد بہادر آباد یوسی 7میں شاہین فیملی پارک اور یوسی میں نئی سڑکوں اور گلیوں سمیت دیگر ترقیاتی منصوبوں کے افتتاح پر منعقدہ تقریب سے خطاب کررہے تھے۔ تقریب سے نائب امیر کراچی و اپوزیشن لیڈر کے ایم سی سیف الدین ایڈوکیٹ، امیر ضلع قائدین انجینئر عبدالعزیز، ٹاؤن چیئر مین رضوان عبدالسمیع، یوسی چیئر مین سلیم عمر اور دیگرنے بھی خطاب کیا۔ انہوں نے مزید کہا کہ قوم اب باشعور ہوچکی ہے اور اپنے ووٹ کی طاقت کو پہچان چکی ہے۔