کشیدگی مزید بڑھتی دکھائی دے رہی ہے،تجزیہ کار

کراچی (ٹی وی رپورٹ) جیو نیوز کے پروگرام ”آج شاہزیب خانزادہ کے ساتھ“ میں میزبان و تجزیہ کار شاہزیب خانزادہ نے اپنے تجزیے میں کہا کہ ایران اور امریکا کے درمیان جنگ بندی کے باوجود کشیدگی کم ہونے کی بجائے مزید بڑھتی دکھائی دے رہی ہے۔ غیر متوقع بیانات اور غیر معمولی عسکری اقدامات نے خطے میں بے یقینی کی فضا پیدا کردی ہے۔ ایران اور امریکا دونوں کی جانب سے ایک دوسرے کے بحری جہازوں کو نشانہ بنانے کے دعوے سامنے آئے ہیں، جس کے باعث عالمی برادری تشویش میں مبتلا ہے کہ آیا یہ جنگ مکمل طور پر ختم ہوگی یا دوبارہ پوری شدت کے ساتھ بھڑک اٹھے گی۔انہوں نے کہا کہ متحدہ عرب امارات نے ایک بار پھر ایران پر ڈرون اور میزائل حملوں کا الزام عائد کیا ہے، جبکہ امریکی تجویز پر ایران کا باضابطہ ردعمل اب تک سامنے نہیں آسکا، جس سے سفارتی سطح پر غیر یقینی صورتحال برقرار ہے۔