KP ، دہشت گردوں کی معاونت میں ملوث کاروباری افراد کی جانچ پڑتال شروع

پشاور(گلزار محمد خان)خیبرپختونخوا کے سرکاری ملازمین اور مختلف محکموں کے ٹھیکیدار وں کے بعد دہشت گردوں کی مالی معاونت کرنیوالے کاروباری افراد کی جانچ پڑتال بھی شروع کر دی گئی ہے جبکہ افغان کاروباری افراد اور تاجروں کی نگرانی کا عمل بھی تیز کردیا گیا ہے ،   قبائلی ،جنوبی اور بندوبستی اضلاع کے مشکوک کاروباری افراد کو گرفتار کیا جائیگا اور ان کے خلاف دہشت گردی ایکٹ کے تحت مقدمات درج ہوں گے ،خیبرپختونخوا کے مختلف قبائلی علاقوں ،جنوبی اضلاع اور صوبہ کے بندوبستی علاقوں میں قانون نافذ کرنے والے اداروں کو اس حوالے سے خصوصی ٹاسک دیا گیا ہے کہ ایسے کاروباری افراد کی نشاندہی کی جائے جو کہ دہشت گرد تنظیموں کی مالی معاونت کر رہے ہیں، ان کے خلاف دہشتگردی ایکٹ کے تحت مقدمات کے اندراج کی ہدایت کی گئی ہے ،ذرائع کے مطابق سرکاری ملازمین اور مختلف محکموں کے ٹھیکیداروں کے بعد کاروباری افراد کے خلاف بھی کاروائی کا اغاز کر دیا گیا ہے ، ذرائع کے مطابق پشاور میں چھوٹے بڑے تمام افغان مہاجر کاروباری افراد جو کہ خیبر بازار ،نمک منڈی، کارخانو مارکیٹ، سبزی منڈی اور پیپل منڈی سمیت شہر کے مختلف مقامات پر کاروبار کر رہے ہیں، ذرائع کے مطابق بعض افغان مہاجر کاروباری افراد کیساتھ افغان ڈاکٹروں کی نگرانی کا عمل بھی شروع کیا گیا ہے۔