وفاقی حکومت کابورڈآف انویسٹمنٹ کوایس آئی ایف سی میں ضم کرنے کا فیصلہ

اسلام آ باد ( رانا غلام قادر/ناصر چشتی )وفاقی حکومت نے سرمایہ کاری نظام کو مزید مؤثر بنانے کیلئے بورڈ آف انویسٹمنٹ(BOI) کو ایس آئی ایف سی(SIFC) میں ضم کرنے کا فیصلہ کیا ہے۔ حکومتی ذرا ئع کے مطا بق انضمام کا عمل وزیراعظم شہباز شریف کے 23 مئی کو متوقع دورۂ چین سے قبل مکمل کیے جانے کا امکان ہے۔یہ پیش رفت چین پاکستان اقتصادی راہداری کے دوسرے مرحلے کے تحت سرمایہ کاری تعاون کو مزید مؤثر بنانے کی کوششوں کا حصہ ہے۔نئے ڈھانچے کے تحت ایس آئی ایف سی غیر ملکی سرمایہ کاری کے فروغ اور سرمایہ کاری پالیسی پر عملدرآمد میں مرکزی کردار ادا کرے گی ۔ایس آئی ایف سی کو اسپیشل اکنامک زونز، ریگولیٹری اصلاحات اور سرمایہ کاری سہولت کاری کیلئے جامع روڈ میپ تیار کرنے کی ذمہ داری بھی دی گئی ہے۔ایس آئی ایف سی کی قیادت میں سرمایہ کاری کے عمل میں تیزی، ادارہ جاتی ہم آہنگی اور سرمایہ کار اعتماد میں مزید بہتری ہو گی۔ بورڈ آف انویسٹمنٹ کو ایس آئی ایف سی میں ضم کرنے کا فیصلہ سرمایہ کاری نظام کو مزید مؤثر اور مربوط بنانے کی جانب اہم پیش رفت ہے۔