ایران کیخلاف اسرائیل امریکا جنگ غیر قانونی و مجرمانہ ہے، سابق یونانی وزیر

کراچی (رفیق مانگٹ) سابق یونانی وزیر خزانہ یانس واروفاکس نے کہا ہے ایران کیخلاف اسرائیل امریکا جنگ غیر قانونی و مجرمانہ ہے۔ جوہری ہتھیاروں پر مغرب کی دوغلی پالیسی، اسرائیل کی ایٹمی صلاحیتوں پر عالمی خاموشی جبکہ ایران پر دباؤ ڈالا جاتا ہے۔ ایران جنگ کے پیچھے نہ کوئی پلان بی تھا نہ ہی پلان اے، ایران نے پڑوسیوں پر حملہ نہیں کیا بلکہ خود جنگوں کا نشانہ بنا۔ ایران کا ردعمل خصوصاً ہرمز بندش مکمل قابلِ پیشگوئی تھا، غزہ اوپن ایئر جیل، وہاں کے حالات انسانی وقار کے خلاف ہیں۔ انہوں نے ایران تنازع کو ایسی جنگ قرار دیا جس کے پیچھے نہ کوئی واضح حکمتِ عملی موجود ہے اور نہ ہی کوئی متبادل منصوبہ، جبکہ انہوں نے مغربی دنیا پر جوہری پالیسی میں کھلے دوہرے معیاراپنانے کا الزام عائد کرتے ہوئے کہا کہ اسرائیل کے معاملے پر خاموشی اور ایران پر دباؤ صریح منافقت ہے. ان کے مطابق اوباما کے دور میں 2015 کا جوہری معاہدہ ایک مؤثر ٹرسٹ اینڈ ویریفائی نظام تھا جسے بعد ازاں ٹرمپ نے بغیر واضح حکمتِ عملی کے ختم کر کے ایک بڑے تنازع کی بنیاد رکھ دی۔