ٹرمپ کاغزہ امن و تعمیر نو منصوبہ مالی بحران کا شکار ہوگیا

کراچی (نیوز ڈیسک) ڈونلڈ ٹرمپ کاغزہ امن و تعمیر نو منصوبہ مالی بحران کا شکار ہوگیا،امریکی صدر کا بورڈ آف پیس مطلوبہ فنڈز حاصل نہ کر سکا،غزہ کی تعمیر نو کیلئے وعدہ شدہ رقوم موصول نہ ہوئیں۔ اسرائیل آئے روز مزید علاقوں پر کنٹرول بڑھا رہا ہے،امن منصوبے کے مستقبل پر سوالات اٹھنے لگے۔ واشنگٹن پوسٹ کے مطابق امریکی صدر ڈونلڈ ٹرمپ کی جانب سے غزہ کے لیے اعلان کردہ امن اور تعمیر نو کا منصوبہ شدید مشکلات کا شکار ہو گیا ہے۔ منصوبے کے نفاذ کے لیے قائم کردہ "بورڈ آف پیس" کو اعلان کے کئی ماہ بعد بھی خاطر خواہ مالی معاونت حاصل نہیں ہو سکی اور متوقع عطیات تقریباً نہ ہونے کے برابر ہیں۔ دوسری جانب حماس کو غیر مسلح کرنے کے حوالے سے مذاکرات تعطل کا شکار ہیں جبکہ اسرائیل غزہ میں مزید علاقوں پر اپنا کنٹرول بڑھا رہا ہے۔ ان حالات میں غزہ کی بڑے پیمانے پر تعمیر نو اور طویل مدتی امن کے قیام کے امکانات کمزور دکھائی دے رہے ہیں، جس کے باعث ٹرمپ انتظامیہ کے اس اہم منصوبے کے مستقبل پر بھی سوالات اٹھنے لگے ہیں۔