آبنائے ہرمز کھلی رکھنے کیلئے فیس دینا بہتر، یونانی شپنگ ٹائیکون کی پیشکش

کراچی (رفیق مانگٹ) یونان کے معروف شپنگ ارب پتی ایوینجیلوس ماریناکس نے کہا ہے کہ اگر آبنائے ہرمز کو کھلا رکھنے کیلئے فیس ادا کرنا پڑے تو وہ اس کیلئے تیار ہیں، کیونکہ راستے کی بندش عالمی تجارت کے لیے زیادہ نقصان دہ ہے۔انہوں نے یہ باتیں ایتھنز میں ٹریڈ ونڈز شپنگ کانفرنس سے خطاب کرتے ہوئے کہی ، ان کے مطابق، اگر ہمیں فیس بھی ادا کرنا پڑے تو یہ اس صورتحال سے کہیں بہتر ہوگا کہ آبنائے بند ہو جائے۔ ماریناکس، جو یونان کے بڑے جہاز مالکان میں شمار ہوتے ہیں اور اپنے کیپیٹل میری ٹائم گروپ کے ذریعے 185 جہازوں اور تقریباً 35 آئل ٹینکروں کے مالک ہیں نے کہا کہ خطے میں کشیدگی کے باعث شپنگ انڈسٹری پہلے ہی اضافی اخراجات برداشت کر رہی ہے۔ انہوں نے بحیرہ احمر میں حوثی باغیوں کے حملوں کے بعد جہازوں کو امیدِ نیک کے راستے موڑنے کی مثال دی، جس سے لاگت میں نمایاں اضافہ ہوا۔ان کا کہنا تھا کہ میرے لیے یہ بہتر ہے کہ کارگو یا جہاز کے سائز کے مطابق 100 ہزار سے 200 ہزار ڈالر فیس ادا کر دی جائے، بجائے اس کے کہ اس تمام جھنجھٹ کا سامنا کیا جائے اور یہ کہ اس رقم سے اب تک ہونے والے نقصانات کا ازالہ بھی ممکن ہے۔ماریناکس کا مؤقف دیگر شپنگ کمپنیوں سے مختلف ہے، جو اس بات پر زور دیتی ہیں کہ آبنائے ہرمز میں آمدورفت کی آزادی برقرار رہنی چاہیے، کیونکہ اس کی بندش عالمی سمندری گزرگاہوں کے لیے خطرناک مثال قائم کرے گی۔یہ آبی راستہ اس وقت عملی طور پر محدود ہو چکا ہے، جب ایران کے پاسدارانِ انقلاب نے امریکا اور اسرائیل کے حملوں کے ردعمل میں یہاں سے گزرنے والے جہازوں کو نشانہ بنانا شروع کیا۔