ایران جنگ کے بعد اسرائیل اور یو اے ای تعلقات مزید مضبوط ، اسرائیلی عہدیدار کا دعویٰ

دبئی (اے ایف پی)ایران جنگ کے بعد اسرائیل اور یو اے ای تعلقات مزید مضبوط ، اسرائیلی عہدیدار کا دعویٰ،یو اے ای کو آئرن ڈوم کی فراہمی اور ایران پر مشترکہ حملوں سے متعلق دعوؤں پر تبصرہ سے گریز ،آئندہ ہفتے دو اسرائیلی وفود متحدہ عرب امارات کا دورہ کریں گے،فرانسیسی خبر ایجنسی سے گفتگو ،ایک سینئر اسرائیلی عہدیدار کا کہنا ہے کہ مشرقِ وسطیٰ میں جاری جنگ کے باعث اسرائیل اور متحدہ عرب امارات کے تعلقات مزید مضبوط ہو رہے ہیں۔خلیجی خطے میں تعینات اسرائیلی عہدیدارنےفرانسیسی خبر ایجنسی سے گفتگو کرتے ہوئے کہا کہ دونوں ممالک کے درمیان فوجی تعاون میں اضافہ ہوا ہے جبکہ تجارت اور کاروباری روابط کو وسعت دینے کے نئے مواقع بھی پیدا ہوئے ہیں۔ان کا مزید کہنا تھا کہ آئندہ ہفتے اسرائیل کے دو وفود متحدہ عرب امارات کا دورہ کریں گے۔ ان میں وزارتِ ٹرانسپورٹ کی ایک ٹیم بھی شامل ہوگی جو بھارت، مشرقِ وسطیٰ اور یورپ کو ملانے والے تجارتی راہداری منصوبے پر بات چیت کرے گی۔یہ دورے 28 فروری کو جنگ شروع ہونے کے بعد پہلے اسرائیلی سرکاری دورے ہوں گے۔اسرائیلی عہدیدار نے کہا کہ یہ تعلقات کو مزید مضبوط بنانے کا ایک موقع ہے۔ ہمیں اس مارکیٹ پر یقین ہے، ہم سمجھتے ہیں کہ لوگوں کو یہاں آنا چاہیے کیونکہ تعاون کے بے شمار مواقع موجود ہیں۔