پاکستان میں کاروباری اعتماد کمزور، 80فیصد اداروں کے سرمایہ کاری فیصلے موخر

اسلام آ باد (رانا غلام قادر ) پاکستان میں کاروباری اعتماد کمزور،سترسے اسی فیصد اداروں نے سرمایہ کاری فیصلے موخر کر دیے۔ سروے کے مطابق مجموعی کاروباری اعتماد 9 فیصد پوائنٹس کمی کے بعد مثبت 13 فیصد رہ گیا ،اوورسیز انویسٹرز چیمبر آف کامرس اینڈ انڈسٹری کا تازہ بزنس کانفیڈنس انڈیکس سروے جاری کردیا گیا ۔ سروے میں پاکستان میں کاروباری اعتماد میں نمایاں کمی سامنے آئی جس کے مطابق ملک میں 70 سے 80 فیصد کاروباری ادارے نئی سرمایہ کاری کے فیصلوں کو موخر یا ان پر نظرثانی کر رہے ہیں،او آئی سی سی آئی نے 2026 کی دوسری سہ ماہی کے دوران کیے گئے بزنس کانفیڈنس انڈیکس سروے کی 29ویں لہر کے نتائج جاری کیے ہیں-سروے کے مطابق مجموعی کاروباری اعتماد 9 فیصد پوائنٹس کمی کے بعد مثبت 13 فیصد رہ گیاجو اس سے قبل 28ویں لہر میں مثبت 22 فیصد تھا،سروے کے مطابق کاروباری اعتماد میں کمی کی بڑی وجوہات میں مشرق وسطیٰ میں جاری کشیدگی، بڑھتی ہوئی مہنگائی، ایندھن کی قیمتوں میں اضافہ، سپلائی چین میں رکاوٹیں، پالیسی غیر یقینی اور اقتصادی نمو کے حوالے سے خدشات شامل ہیں-سروے کے مطابق کاروباری اداروں کا کہنا ہے کہ موجودہ صورتحال نے سرمایہ کاری کے فیصلوں، پیداواری لاگت، خام مال کی دستیابی اور مستقبل کی منصوبہ بندی کو متاثر کیا ہے،شعبہ جاتی بنیادوں پر خدمات کے شعبے میں سب سے زیادہ کمی دیکھی گئی جہاں اعتماد 20 پوائنٹس گر کر مثبت 14 فیصد رہ گیا،مینوفیکچرنگ کے شعبے میں بھی7 پوائنٹس کی کمی ریکارڈ کی گئی تاہم ریٹیل سیکٹر واحد شعبہ رہا جہاں کاروباری اعتماد میں 3 پوائنٹس بہتری آئی اور یہ مثبت 20 فیصد تک پہنچ گیا۔