کراچی میں بارش کا امکان نہیں

کراچی (این این آئی) خلیجِ بنگال میں بننے والے کم دباؤ کے نظام اور بحیرہ عرب سے آنے والی مرطوب ہواؤں کے اثرات کے باعث ملک کے بالائی علاقوں میں مون سون سرگرم ہونے کا امکان ہے، تاہم کراچی میں فی الحال بارش کی توقع نہیں، البتہ آئندہ دو روز کے دوران گرمی اور حبس میں عارضی اضافہ ہو سکتا ہے۔ آج اور کل شہر کا زیادہ سے زیادہ درجہ حرارت 35 سے 37 ڈگری سینٹی گریڈ کے درمیان رہنے کی توقع ہے۔محکمہ موسمیات کے ارلی وارننگ سینٹر کے مطابق بحیرہ عرب اور خلیجِ بنگال سے مرطوب ہوائیں ملک کے بالائی علاقوں میں داخل ہو رہی ہیں، جبکہ ایک مغربی لہر بھی شمالی علاقوں تک پہنچنے کا امکان ہے۔ اس موسمی صورتحال کے باعث 8 اور 9 جولائی کو سکھر، شکارپور، لاڑکانہ، دادو، جیکب آباد، شہید بینظیر آباد، قمبر شہدادکوٹ اور نوشہرو فیروز کے مختلف مقامات پر تیز ہواؤں اور گرج چمک کے ساتھ بارش متوقع ہے۔محکمہ موسمیات کے مطابق خلیجِ بنگال میں بننے والا کم دباؤ اس وقت بھارت کی بالائی فضاؤں میں موجود ہے، جس کے اثرات کے باعث کراچی میں درجہ حرارت میں ایک سے دو ڈگری سینٹی گریڈ تک اضافہ ریکارڈ کیا گیا ہے۔ منگل اور بدھ کی درمیانی شب ہواؤں کی رفتار میں کمی کے باعث شہر میں حبس کی شدت میں اضافہ محسوس کیا جا سکتا ہے۔محکمہ موسمیات نے کہا کہ بھارت سے منسلک اس موسمی نظام کے زیرِ اثر کراچی میں آئندہ دو روز تک گرمی کی شدت نسبتاً زیادہ محسوس ہوگی، تاہم شہر میں سمندری ہوائیں مکمل طور پر بند ہونے کا کوئی امکان نہیں۔