ایئرپورٹ روڈ پر 3روز سے دھرنا جاری ، ورثاء اور لواحقین نے لاشیں دفنانے سے انکار کردیا

کوئٹہ ( اسٹاف رپورٹر) ایئر پورٹ روڈ پر ہنہ اوڑک میں دہشت گردوں کی فائرنگ سے جاں بحق اور لاپتہ ہونے والے افراد کے لواحقین ، ورثاء، علاقہ مکینوں اور سیاسی جماعتوں کا مشترکہ دھر نا جاری ہے اور انہوں نے لاشیں دفنانے سے انکار کرتے ہوئے کہا ہے کہ جب تک حملے کے بعد سے لاپتہ افراد بازیاب، ہنہ اوڑک اور دیگر علاقوں سے مسلح گروہوں کا خاتمہ اور مذاکرات کے لیے بااختیار ریاستی نمائندے نہیں آتے دھرنا جاری رہیگا جبکہ آج دھرنے کے مقام پرجلسہ ہوگا۔ منگل کے روز ہنہ اوڑک میں دہشت گردوں کی فائرنگ سے جاں بحق ہونے والے چار افراد کے لواحقین ، لاپتہ ہونے والے افراد کے ورثاء، علاقہ مکینوں اور سیاسی جماعتوں کاائیر پورٹ روڈ پر دیا گیا مشترکہ دھرناتیسرے روز بھی جاری رہا، دھرنے کے مقام پر متاثرہ خاندانوں، ہنہ اوڑک عوامی کمیٹی اور سیاسی جماعتوں کے نمائندوں کے مشترکہ اجلاس میں فیصلہ کیا گیا کہ مطالبات کی منظوری تک میتوں کو نہیں دفنایا جائیگا اور دھرنا جاری رہے گاجبکہ آج شام چار بجے دھرنے کے مقام پر جلسہ عام منعقد کیا جائے گا جس میں سیاسی جماعتوں کی مرکزی قیادت کو شرکت کی دعوت دی گئی ہے، ہنہ اوڑک عوامی کمیٹی کے چیئرمین مولوی رحمت اللہ نے بتایا ہے کہ ہمارے تین بنیادی مطالبات ہیں حملے کے بعد لاپتہ ہونے والے افراد کو فوری بازیاب، ہنہ اوڑک اور دیگر متاثرہ علاقوں کو مسلح گروہوں کا خاتمہ اور مذاکرات کے لیے بااختیار ریاستی نمائندوں کی آمد شامل ہیں۔