اڈیالہ جیل کے باہر PTI کارکن آپس میں لڑ پڑے، 2 گرفتار

راولپنڈی (حافظ وسیم اختر،نمائندہ جنگ) اڈیالہ جیل کے باہر پاکستان تحریک انصاف کے کارکن آپس میں لڑپڑے، دو کو گرفتار کر لیا گیا ، منگل کو اڈیالہ جیل کے قریب علیمہ خان نے اپنی بہنوں اور پارٹی کارکنوں کے ہمراہ ملاقات نہ کرانے پردھرنادیا،اس دوران کارکنوں کا ایک گروپ علیمہ خان سے ملنے پہنچا تودوسرے گروپ نے انہیں آگے بڑھنے سے روک دیا جس پرکارکنوں کے درمیان ہاتھا پائی اور لڑائی شروع ہوگئی ،گالم گلوچ ہوئی ،درجنوں کارکنوں نے ایک نہتے کارکن کو گھیر کر بدترین تشدد کا نشانہ بنایا،لڑائی کے دوران کارکنوں نے ایک دوسرے کے کپڑے پھاڑ دئیے،دھرنے میں موجود خواتین نے بیچ بچاؤ کرا کے معاملہ رفع دفع کرایا،لیکن کچھ وقفے کے بعددوبارہ جھگڑاشروع ہوگیا اورمشتعل کارکنوں نے ایک شخص کو مکے مار کراس کی عینک توڑ دی،دوسری مرتبہ بھی کارکنوں نے ایک دوسرے کے کپڑے پھاڑے ،پولیس نے اڈیالہ جیل فیکٹری ناکے سے 2 کارکنوں کو حراست میں لے لیا،ان پر مبینہ طور پر کھلے عام منشیات استعمال کرنے کا الزام ہے،دونوں کو اڈیالہ چوکی منتقل کر دیا گیا ۔