پولیو کا خاتمہ قومی ترجیح ،تمام اسٹیک ہولڈرز مشترکہ کوششیں مزید تیز کریں، وزیراعظم

اسلام آباد( نیوز رپورٹر) وزیرِ اعظم شہباز شریف نے کہا ہے کہ پولیو کا خاتمہ اہم قومی ترجیح ہے اور تمام اسٹیک ہولڈرز مشترکہ کوششیں مزید تیز کریں، بچوں کے مستقبل کو پولیو جیسے موذی مرض سے بچانے کیلئے ہر ممکن اقدام کر رہے ہیں۔وزیر اعظم سے گزشتہ روز پولیو نگرانی بورڈ کے 7 رکنی وفد نے ملاقات کی وفد میں روٹری کے پولیو اوورسائیٹ بورڈ کے چیئر مائیک میکگورن (Mike McGovern)، گیٹس فاؤنڈیشن کے گلوبل ڈیویلپمنٹ کے صدر کرس ایلائیس (Chris Elias)،ریجنل ڈائیریکٹر WHO EMRO ڈاکٹر حنان بلخی (Dr. Hanan Balkhy)، یونیسیف (UNICEF)، گاوی (GAVI) اور پاکستان میں انسداد پولیو کیلئے تعاون کے دیگر شراکت داروں کے نمائندگان شریک تھے۔وزیراعظم نے اجلاس میں پولیو سے پاک پاکستان کے عزم کی تجدید کی۔ وزیراعظم نے جنوبی خیبر پختونخوا کے پولیو ہاٹ اسپاٹس پر خصوصی توجہ اور مؤثر حکمتِ عملی اپنانے کی ہدایت کی۔انہوں نے کہا کہ روٹری انٹرنیشنل، گیٹس فاؤنڈیشن، ڈبلیو ایچ او، یونیسیف، کنگ سلمان ریلیف، سینٹر فار ڈیزیز کنٹرول اینڈ پریوینشن USA اور تمام شراکت داروں کے انسداد پولیو کے حوالے سے اقدامات پر تہہ دل سے شکر گزار ہیں۔وفد نے پولیو فری پاکستان کے لیے حکومت کے مؤثر اقدامات کو سراہتے ہوئے نمایاں پیش رفت پر وزیراعظم کو خراج تحسین پیش کیا۔