190 ملین پاؤنڈز کیس، عمران اور بشریٰ کے وکیل کواپیلوں پر دلائل کیلئےآخری مہلت

اسلام آباد (خبر نگار) اسلام آباد ہائیکورٹ نے 190 ملین پاؤنڈز کیس میں بانی پی ٹی آئی عمران خان اور بشری بی بی کی ٹرائل کورٹ سے سزا کے خلاف مرکزی اپیلوں پر دلائل کیلئے آخری مہلت دیدی ، چیف جسٹس سردار محمد سرفراز ڈوگر اور جسٹس محمد آصف پر مشتمل ڈویژن بنچ نے واضح کیا کہ مزید التوا نہیں ملے گا، آئندہ سماعت پر دلائل کا آغاز نہ کیا تو نیب کو سن کر اور ریکارڈ دیکھ کر فیصلہ سنا دینگے۔ عدالت نے آئندہ سماعت پر دلائل دینے کی لطیف کھوسہ کی انڈر ٹیکنگ پر کیس ملتوی کرنے کی استدعا منظور کر لی۔ عدالتی حکم نامے کے مطابق وکیل سردار لطیف کھوسہ کا وکالت نامہ عمران اور بشری کی جانب سے ریکارڈ پر موجود ہے۔ انہوں نے واضح انڈر ٹیکنگ دی ہے کہ آئندہ سماعت پر مزید التوا نہیں مانگیں گےاور اپیلوں پر دلائل دیں گے۔ سردار لطیف کھوسہ کی انڈر ٹیکنگ کے بعد عدالت کیس ملتوی کر رہی ہے،عدالت واضح کیا کہ اس کیس میں اب حتمی مہلت دی جا رہی ہے۔