سگریٹ برانڈز کے کم قیمت پر نئے ویریئنٹ متعارف کرانے پر پابندی عائد

اسلام آباد (رپورٹ: حنیف خالد) حکومت نے سگریٹ کے برانڈز کے مختلف ویریئنٹس کی قیمتوں کے حوالے سے نئی پابندی عائد کر دی ہے جس کے تحت کسی بھی سگریٹ بنانے والے یا درآمد کنندہ کو کسی موجودہ برانڈ کا نیا ویریئنٹ اس برانڈ کے پہلے سے موجود سب سے کم حقیقی نرخ سے کم قیمت پر متعارف کرانے یا فروخت کرنے کی اجازت نہیں ہوگی۔ اس پابندی کے تحت کسی موجودہ برانڈ کی کم از کم قیمت کا تعین مالی سال کے بجٹ کے اعلان کے روز اس برانڈ کے مارکیٹ میں دستیاب تمام ویریئنٹس میں سے سب سے کم حقیقی فروختی قیمت کی بنیاد پر کیا جائے گا۔ نئے مالی سال کے دوران اگر کوئی سگریٹ کمپنی اپنے موجودہ برانڈ کا نیا ویریئنٹ مارکیٹ میں لاتی ہے تو اس کی قیمت مقرر کرتے وقت بجٹ کے اعلان کے دن موجودہ برانڈ کی ریکارڈ شدہ کم ترین قیمت کو مدنظر رکھنا لازمی ہوگا۔ اس اقدام کا مقصد ایک ہی برانڈ کے نام سے کم قیمت والے نئے ویریئنٹس متعارف کرا کے قیمتوں کے فرق سے فائدہ اٹھانے کے رجحان کو روکنا اور سگریٹ مصنوعات کی قیمتوں کے حوالے سے مقررہ ضوابط پر عمل درآمد یقینی بنانا ہے۔