جان قربان مگر سندھ تقسیم نہیں ہونے دیں گے‘ پیپلز پارٹی

کراچی ( اسٹاف رپورٹر)سندھ اسمبلی میں نئے صوبوں اور انتظامی یونٹس پر بحث دوسرے روز بھی جاری رہی‘وزیر بلدیات سندھ سید ناصر حسین شاہ نے کہا کہ سندھ تقسیم نہیں ہوگا ۔ سندھ کی تقسیم اور سندھو دیش کے خلاف قرارداد مل کر منظور کی جائے ۔سندھو دیش کی بات کرنے والوں کے خلاف بھی ایوان متحد ہو کر پیغام دے‘پیپلز پارٹی کے رکن امتیاز احمد شیخ نے کہا کہ امید ہے کہ سندھ کی وحدت کے مسئلے پر اپوزیشن ہمارا ساتھ دے گی‘سندھی جان قربان کردیں گے لیکن اپنے صوبے کوتقسیم ہونے نہیں دیں گے‘ انتظامی یونٹس تو اضلاع اورڈویژن ہوتے ہیں‘ اگر ایسے انتظامی یونٹس چاہتے ہیں تو تجویز دیں‘بلدیاتی قوانین پر بات ہو سکتی مگرسندھ کی وحدت پر کوئی بات نہیں ہو سکتی ‘ایم کیو ایم پاکستان کے رکن افتخار عالم نے کہا کہ یہ مسئلہ ایک صوبے یا ایک شہر کا نہیںیہ پاکستان کے ریاستی اداروں کا سوال ہے‘آبادی گئی گنا بڑھ چکی ہے۔