امریکا کیلئے نیا خطرہ، الشباب اور حوثیوں میں گٹھ جوڑ کا انکشاف

کراچی (نیوز ڈیسک) امریکا کیلئے نیا خطرہ، الشباب اور حوثیوں میں گٹھ جوڑ کا انکشاف ہوا ہے۔حوثیوں سے حاصل اسلحہ القاعدہ سے وابستہ الشباب تک پہنچانے والا مبینہ نیٹ ورک سامنے آگیا۔وال اسٹریٹ جرنل کے مطابق یمن کے حوثی باغیوں اور صومالیہ میں سرگرم القاعدہ سے وابستہ شدت پسند گروہ الشباب کے درمیان اسلحے کی مبینہ تجارت اور تعاون نے امریکا کے لیے ایک نیا سکیورٹی چیلنج پیدا کردیا ہے۔ جبرئیل ’’ون آرمڈ‘‘ یحییٰ علی نامی صومالی شخص نے ایک ایسے نیٹ ورک میں کردار ادا کیا جس کے ذریعے یمن کے حوثیوں سے فوجی نوعیت کے ہتھیار خرید کر انہیں صومالیہ میں الشباب تک پہنچایا جاتا تھا۔ جبرئیل نے یہ اسلحہ صومالی حکومت کے خلاف لڑنے والے الشباب کو فراہم کیا، جبکہ دونوں گروہوں کے درمیان رابطے میں ایک اسلحہ ڈیلر نے اہم کردار ادا کیا۔ رپورٹ کے مطابق حوثیوں اور الشباب کے درمیان بڑھتے روابط سے خلیج عدن اور بحیرہ احمر کے اطراف پہلے سے موجود سکیورٹی خطرات میں مزید اضافہ ہوسکتا ہے۔ اس خطے سے عالمی تجارت اور تیل کی ترسیل کا اہم راستہ گزرتا ہے، اس لیے دونوں شدت پسند گروہوں کے درمیان ممکنہ اسلحہ تعاون امریکا اور اس کے اتحادیوں کے لیے ایک نیا اور پیچیدہ خطرہ بن سکتا ہے۔