پینٹاگون میں ہنگامہ خیز صورتحال، امریکی آرمی سیکریٹری مستعفی

کراچی (نیوز ڈیسک) پینٹاگون میں ہنگامہ خیز صورتحال، امریکی آرمی سیکریٹری مستعفی ہوگئے۔ ہیگستھ سے اختلافات پر ڈین ڈرسکول نے اقدام اٹھایا،حالیہ دنوں میں متعدد اعلیٰ حکام فارغ یا استعفیٰ دے چکے ۔ ٹیکنالوجی سرمایہ کار ڈرسکول روس اور یوکرین جنگ خاتمے کیلئے مذاکرات میں بھی اہم کردار ادا کرتے رہے۔ گارڈین کی رپورٹ کے مطابق امریکی فوج کے سیکریٹری ڈین ڈرسکول نے صدر ڈونلڈ ٹرمپ کو اپنا استعفیٰ پیش کردیا ہے، جس کے بعد وہ پینٹاگون سے علیحدہ ہونے والی ایک اور نمایاں شخصیت بن گئے ہیں۔ ڈرسکول کے امریکی وزیر دفاع پیٹ ہیگستھ کے ساتھ اختلافات کی اطلاعات سامنے آتی رہی تھیں اور وہ مبینہ طور پر کچھ عرصے سے پینٹاگون چھوڑنے پر غور کر رہے تھے۔ وائٹ ہاؤس نے ڈرسکول کی خدمات کو سراہتے ہوئے کہا کہ انہوں نے فوج کی تیاری، عسکری صلاحیت اور صدر ٹرمپ کے دفاعی ایجنڈے کو آگے بڑھانے میں مؤثر کردار ادا کیا۔ ان کا استعفیٰ ایسے وقت میں سامنے آیا ہے جب پینٹاگون کئی ماہ سے انتظامی ہلچل کا شکار ہے اور متعدد اعلیٰ فوجی حکام عہدوں سے ہٹائے یا مستعفی ہو چکے ہیں۔ عراق جنگ کے سابق فوجی اور ٹیکنالوجی سرمایہ کار ڈرسکول روس اور یوکرین جنگ کے خاتمے کے لیے مذاکراتی کوششوں میں بھی اہم کردار ادا کرتے رہے، جبکہ وہ امریکی فوج کے لیے ڈرون اور انسدادِ ڈرون صلاحیتوں کی تیز رفتار ترقی کے حامی تھے۔