نیویارک، چاقو حملہ بینک آف امریکا کی نائب صدر ہلاک ، ملزمہ بھی ماری گئی

کراچی (نیوزڈیسک) امریکا میں نیویارک سٹی کے ٹائمز اسکوائر میں پیر کے روز ایک خاتون حملہ آور نے چاقو کے وار سے ایک خاتون کو ہلاک جبکہ معمر شہری کو زخمی کردیا،ملزمہ پولیس کی جوابی کارروائی میں ہلاک ہوگئیں جس کے بارے میں بتایا جارہا ہے کہ اسے ذہنی صحت کے مسائل کا سامنا تھا ،ہلاک خاتون کی شناخت 32 سالہ ایرن پیاسنٹی کے نام سے ہوئی ہے جو بینک آف امریکا کی نائب صدر تھیں،پولیس کی فائرنگ سے ہلاک ملزمہ کی شناخت بھی کر لی گئی ہے۔نیویارک میئر ظہران ممدانی نے کہا کہ این وائی پی ڈی اس معاملے کی اندرونی تحقیقات کرے گی اور باڈی وورن کیمرے کی فوٹیج عوام کے لیے جاری کی جائے گی۔ٹائمز اسکوائر میں کام کرنے والے ایک عینی شاہد (کلائیڈ بینجمن) نے علاقے میں ذہنی صحت کے مسائل پر تشویش کا اظہار کرتے ہوئے کہا کہ شہر میں ذہنی صحت کی خرابی ایک بڑی وبا کی صورت اختیار کر چکی ہے جس پر جلد از جلد قابو پانا ضروری ہے۔نیویارک پولیس کا کہنا ہے کہ ملزمہ کی شناخت 39سالہ پامیلا سسینروس کےنام سے ہوئی ہے جو کوئنز کی رہائشی ہے۔تفتیش کاروں کے مطابق، سسنیروس بدھ کی سہ پہر تقریباً 4:26 بجے ویسٹ 42ویںاسٹریٹ اور سیونتھ ایونیو کے قریب دو چاقوؤں کی مدد سے لوگوں پر حملہ آورہورہی تھی، جس کے دوران اس نے مذکورہ مرد اور پیاسنٹی کو چاقو مارا۔پولیس نے بتایا کہ اس کے بعد وہ شمال کی جانب ٹائمز اسکوائر میں واقع این وائی پی ڈی سب اسٹیشن کی طرف بھاگی، جہاں اہلکاروں نے اس کا گھیراؤ کیا۔ پولیس کے مطابق جب اہلکار اس کے قریب پہنچے تو سسنیروس نے چاقو پھینکنے سے انکار کر دیا۔پولیس نے بتایا کہ اہلکاروں نے فائرنگ کی جس سے وہ گولی کا شکار ہوئی۔این وائی پی ڈی کمشنر جیسیکا ٹِش کے مطابق موقعِ واردات سے دو چاقو برآمد ہوئے ہیں۔ این وائی پی ڈی نے برآمد شدہ ہتھیاروں کی تصویر بھی جاری کی ہے۔کمشنر ٹِش نے پریس بریفنگ میں بتایا کہ پہلا متاثرہ شخص، 68 سالہ مرد، سب وے سے باہر نکلا ہی تھا اور اپنی اہلیہ کے ساتھ سڑک پار کرنے کا انتظار کر رہا تھا کہ ملزمہ نے ایک بیگ سے چاقو نکالے، انہیں ہوا میں لہرایا اور پھر "بظاہر ایک اچانک اور بلا اشتعال حملے میں" اس کے پیٹ میں چاقو گھونپ دیا۔ٹِش کا کہنا تھا کہ اس کے بعد ملزمہ سیونتھ ایونیو سے 42nd اسٹریٹ کی طرف گئی، جہاں اس نے دوسری متاثرہ خاتون، پیاسنٹی سے بھی اسی طرح ایک بظاہر اچانک اور بلا اشتعال حملے میں پیٹ میں چاقو مارا۔حکام کے مطابق، ملزمہ پھر شمال کی طرف این وائی پی ڈی سب اسٹیشن کی جانب بھاگی۔ عینی شاہدین نے پولیس اہلکاروں کو اشارہ کیا، جنہوں نے چار منٹ تک اس کا سامنا کیا اور "اسے چاقو پھینکنے کے متعدد احکامات دیے"، جسے اس نے ماننے سے انکار کر دیا۔ٹِش نے بتایا، "اس سامنا کرنے کے دوران، اس نے اہلکاروں سے کہا،میں ہتھیار نہیں پھینکوں گی ۔ میں تم دونوں کو قتل کرنا زیادہ پسند کروں گی۔ اس نے دہرایا،میں تمہیں مار ڈالوں گی۔"ٹِش کے مطابق، دو اہلکاروں کے اپنے سروس ہتھیاروں سے فائرنگ کرنے سے پہلے پولیس نے دو بار ٹیزر (Tasers) کا استعمال کیا۔سسنیروس کو ہسپتال میں مردہ قرار دے دیا گیا۔ ٹِش نے بتایا کہ اس کی "ذہنی صحت کی خرابی کی دستاویزی ہسٹری" موجود تھی۔ٹائمز اسکوائر میں کام کرنے والے کلائیڈ بینجمن نے کہا، "مجھے معلوم تھا کہ یہ ذہنی صحت کے مسائل ہیں۔ بھائی، یہ یہاں ایک بڑی وبا ہے، ہمیں اس پر قابو پانا ہوگا۔"پولیس کا کہنا ہے کہ ایرن پیاسنٹی کے سوشل میڈیا کے مطابق وہ بینک آف امریکا میں بزنس سلیکشن اینڈ کنفلکٹس کی وائس پریذیڈنٹ کے طور پر کام کرتی تھیں۔ بینک آف امریکا نے ایک بیان جاری کیا:"ہم اپنی ساتھی کے المناک نقصان پر شدید صدمے میں ہیں اور گہرے غمزدہ ہیں۔ وہ ایک قیمتی ساتھی تھیں جن کی کمی شدت سے محسوس کی جائے گی۔ ہماری ہمدردیاں ان کے اہل خانہ اور ان کے تمام پیاروں کے ساتھ ہیں۔"ان کے سوشل میڈیا کے مطابق، انہوں نے 2016 میں یونیورسٹی آف پنسلوانیا اور 2021 میں فورڈہم لا سے گریجویشن کی تھی۔