ہرمز میں 2 ٹینکرز نشانہ، نئے امریکی حملے، پچھتانا پڑے گا، ایران، جواب دیا تو مزید سخت کارروائی ہوگی، ٹرمپ

تہران (اے ایف پی /نیوزڈیسک )آبنائے ہرمز سے سعودی تیل لے جانے والے دو ٹینکرزپر حملے ہوئے ہیں جس کے بعد امریکا نے پاسدارانِ انقلاب کے ٹھکانوں کو ایک بار پھر تازہ حملوں کا نشانہ بنایا ہے۔ایرانی میڈیا کے مطابق کنارک ‘چاہ بہار‘ بندر عباس‘ جاسک ‘لاوان ‘ سیرک ‘عسلویہ اور قشم میں دھماکوں کی آوازیں سنی گئیں جبکہ کرمان کا ہوائی اڈہ بھی نشانہ بناہے‘سیرک میںشادی کی تقریب میں شریک ایک بچے سمیت 4افراد شہید اور متعدد زخمی ہوئے ہیں ‘امریکی حملوں میں متعدد سویلین انفرااسٹرکچر کوبھی نقصان پہنچا ہے ۔دوسری جانب ایرانی فوج نے خطے میں امریکی اہداف کے خلاف فیصلہ کن کارروائی شروع کرتے ہوئے خلیج میں امریکی اڈوں پر میزائل اور ڈرونز داغ دیئے ہیں ۔اردن میں ایمرجنسی سائرن بج اٹھے جبکہ شام کی فضائی حدود میں تین میزائل کو روکا گیاہے ‘ ادھر صدرٹرمپ نے ایران کے ساتھ معاہدےکے امکان کو مستردکرتے ہوئے خبردار کیا کہ اگر تہران نےجوابی کارروائی کی تو امریکا اس سے کہیں زیادہ سخت اور بڑے پیمانے پر حملہ کرے گا۔ انہوں نے مزید دھمکی دی کہ سب سے بڑا حملہ بعد میں کیا جا سکتا ہے جس کے بعد ایران کا بہت کم حصہ باقی بچے گا۔تنازع بڑھا تو ایران کا مکمل صفایاہوجائیگاجبکہ پاسدارانِ انقلاب نے متنبہ کیاہے کہ واشنگٹن کو اپنے نئے حملوں پر پچھتاوا پڑیگا‘ جارحیت کرنے والوں کیلئے سخت سزا اور عبرتناک انجام منتظر ہے‘ دوسری جانب قطر نے خبردار کیا ہے کہ ہرمز کی مستقل بندش خطے میں کشیدگی کو مزید بڑھائے گی جو کہ تمام فریقین کے لیے نقصان دہ ہےجبکہ ایرانی صدر مسعود پزشکیان نے ایس سی او سربراہی اجلاس سے خطاب کرتے ہوئے کہاہے کہ اگر امریکا اسلام آباد مفاہمتی یادداشت کے تحت اپنی ذمہ داریوں کی پاسداری کرے تو ایران بھی معاہدے پر عمل درآمد فوری طور پر دوبارہ شروع کر دے گا۔دھمکیوں اور دباؤسے سفارتی کوششیں متاثرہوسکتی ہیں ۔ایرانی وزارت خارجہ کے ترجمان اسماعیل بقائی کا کہنا ہے کہ امریکا مشرق وسطیٰ کی دلدل میں پھنس چکا ہے جبکہ ایرانی پارلیمنٹ کےا سپیکر محمد باقرقالیباف نے واضح کیا ہے اگر ایران خلیج فارس سے تیل نہیں برآمد کرے گا تو پھر کوئی نہیں کرے گا‘اگر امریکا نے محاصرہ مزید سخت کیاتو تہران فوجی کارروائی کے ذریعے جواب دے گا۔ انہوںنے شہریوں سے پٹرول کا استعمال کم کرنے کی بھی اپیل کی۔ ادھر وائٹ ہاؤس کے ایک اعلیٰ عہدیدار نے بتایاہے کہ تہران معاہدہ کرنا چاہتا ہے لیکن مطلوبہ حد تک آگے بڑھنے پر تیار نہیں‘ صدر ٹرمپ نےتمام آپشنز کھلے رکھے ہوئے ہیں۔ کرغزستان میں شنگھائی تعاون تنظیم اجلاس کے موقع پرصدر پزشکیان سے ملاقات کے دوران روسی صدرپوٹن کا کہناتھاکہ روس مشکل دور میں تہران کی مدد اوراسے ضروری سامان فراہم کررہا ہے ‘اجلاس کے موقع پر ایرانی وزیر خارجہ عباس عراقچی نے چینی وزیر خارجہ وانگ یی سے ملاقات کی‘ ادھرامریکی وزیردفاع پیٹ ہیگستھ سے اختلافات پر امریکی فوج کے سیکریٹری ڈین ڈرسکول نے عہدہ سنبھالنے کے تقریباً 18 ماہ بعد استعفیٰ دے دیا ہے۔شنگھائی تعاون تنظیم نے سربراہی اجلاس کے اعلامیے میں ایران پر حالیہ حملوں کی مذمت کر دی۔