امریکا نے سعودی عرب اور قطر کے توانائی مراکز کیلئے مزید پیٹریاٹ بھیج دئیے

کراچی (نیوز ڈیسک) امریکا نے سعودی عرب اور قطر کے توانائی مراکز کیلئے مزید پیٹریاٹ بھیج دئیے۔ خطے میں بڑھتے خطرات پر فضائی دفاع مضبوط بنایا جا رہا ہے، توانائی تنصیبات کو ممکنہ میزائل حملوں سے بچایا جائیگا۔ ایکسوس کی رپورٹ کے مطابق امریکا نے سعودی عرب اور قطر میں توانائی کی اہم تنصیبات کے تحفظ کیلئے مزید پیٹریاٹ میزائل بیٹریاں بھیج دی ہیں۔ امریکی فوج نے حالیہ عرصے میں دونوں خلیجی ممالک میں اہم تنصیبات کی فضائی دفاعی صلاحیت بڑھانے کیلئے پیٹریاٹ سسٹمز تعینات کیے ہیں۔ یہ اقدام ایسے وقت میں سامنے آیا ہے جب خطے میں فوجی کشیدگی اور میزائل حملوں کے خطرات میں اضافہ ہوا ہے۔ پیٹریاٹ میزائل نظام بیلسٹک میزائل سمیت مختلف فضائی خطرات کو روکنے کیلئے استعمال کیا جاتا ہے۔ امریکی اقدامات کا مقصد سعودی عرب اور قطر میں توانائی کے بنیادی ڈھانچے کو ممکنہ حملوں سے محفوظ رکھنا ہے۔