اربوں روپے کے بلاسود قرضے فراہم کرنیوالی پنجاب ہیلتھ فاؤنڈیشن بند کرنے کا فیصلہ

لاہور (محمد صابر اعوان سے ) پنجاب میں ڈاکٹروں کو بلاسود قرضے فراہم کرکے ہزاروں افراد کو روزگار کے مواقع دینے والی پنجاب ہیلتھ فاؤنڈیشن کو بند کرنے کا معاملہ سامنے آ گیا۔ 1992ء میں قائم ہونے والے اس ادارے نے اب تک 2100 سے زائد ڈاکٹرز کو ڈھائی ارب روپے کے بلاسود قرضے فراہم کیے، جن سے 2100 صحت مراکز قائم اور 10 ہزار افراد کو روزگار ملا۔ فاؤنڈیشن کی قرضوں کی واپسی کی شرح 98 فیصد سے زائد ہے، جبکہ ادارہ اپنے انتظامی اخراجات بھی خود برداشت کر رہا ہے۔ذرائع کے مطابق پنجاب ہیلتھ فاؤنڈیشن کے بینک اکاؤنٹ میں ایک ارب 32 کروڑ 80 لاکھ روپے موجود ہیں، جبکہ ادارے نے اپنے انتظامی اخراجات کے لیے حکومت سے مالی معاونت بھی حاصل نہیں کی۔ اس کے باوجود فاؤنڈیشن کی بندش کا معاملہ زیر غور ہے، جس پر ادارے کی کارکردگی اور مالی خودکفالت کے تناظر میں سوالات اٹھ رہے ہیںمحکمہ صحت کے ترجمان کے مطابق پنجاب ہیلتھ فاؤنڈیشن کی بندش کا معاملہ زیر غور ہے اور اس حوالے سے فیصلہ حکومتی کفایت شعاری اقدامات کے تحت کیا گیا ہے۔ اکیڈمی آف فیملی فزیشن کے سربراہ ڈاکٹر طارق میاں نے کہا ہے کہ ہیلتھ فاؤنڈیشن کو بند کرنے کا اقدام انتہائی نامناسب اور پرائیوٹ ہیلتھ سیکٹر کا گلہ گھونٹنے سے صوبہ بھر میں ہیلتھ ڈلیوری سسٹم متاثر ہو گا ۔