پی ٹی آئی اور کالعدم ٹی ٹی پی ایک ہی سکے کے دو رخ ہیں، اختیار ولی

04 اکتوبر ، 2026

اسلام آباد (این این آئی) وزیراعظم کے کوآرڈی نیٹر برائے اطلاعات خیبرپختونخوا اختیار ولی خان نے الزام عائد کیا ہے کہ کالعدم تحریک طالبان پاکستان اور پاکستان تحریک انصاف کے درمیان گٹھ جوڑ کے شواہد موجود ہیں، جبکہ دونوں تنظیمیں ایک ہی سکے کے دو رخ ہیں۔ ایک بیان میں انہوں نے کہا کہ وزیراعلیٰ خیبرپختونخوا سہیل آفریدی کے ساتھ گزشتہ روز ایک ویڈیو میں نظر آنے والے نوجوان کا تعلق کالعدم تنظیم سے ہے، ایسے عناصر مساجد اور عوام پر حملوں سمیت خواتین اور بچوں کو تشدد کا نشانہ بنانے میں ملوث ہیں۔اختیار ولی خان نے پی ٹی آئی پر دہشتگرد تنظیموں کی فنڈنگ، اسپانسرنگ اور سہولت کاری کا الزام بھی عائد کیا اور بتایا کہ ذاکر اللہ کی تصاویر پی ٹی آئی کے متعدد ایم این ایز اور ایم پی ایز کے ساتھ موجود ہیں۔