ایم ڈی بیت المال ظہیر عباس کھوکھر نے عہدے سے استعفیٰ دیدیا

اسلام آ باد ( خصو صی رپورٹر ) وفاقی حکومت کی جانب سے ایم ڈی بیت المال ظہیر عباس کھوکھر کو عہدے سے ہٹانے کا عمل مکمل ہونے سے قبل ہی ایم ڈی بیت المال نے عہدے سے استعفیٰ دیدیا، اسلام آباد میں الوداعی پریس کانفرنس کرتے ہوئے ظہیر عباس کھوکھر نے کہا انہوں نے ایم ڈی بیت المال کے عہدے سے استعفیٰ دیدیا اور عہدے کا چارج بھی چھوڑ دیا ہے-وہ وزیر اعظم شہباز شریف کے ماتحت کام نہیں کرسکتے-دوسری جانب ذرائع کے مطابق وفاقی کابینہ نے تین روز قبل ایم ڈی بیت المال ظہیر عباس کھوکھر کو ڈی نوٹفیائی کرنے کیلئے تخفیف غربت و سماجی تحفظ ڈویژن کی سمری کی سرکولیشن کے ذریعے منظوری دی اور ایم ڈی بیت المال کو عہدے سے ہٹانے کا عمل مکمل ہونے کیلئے نوٹفیکیشن جاری ہونا باقی تھا-ظہیر عباس کھوکھر کو تحریک انصاف حکومت کے دور میں اپریل دو ہزار اکیس میں دو سال کیلئے ایم ڈی بیت المال تعینات کیا گیا-حکومتی ذرائع کا کہنا ہے کہ ایم ڈی بیت المال سیاسی شخصیت ہیں اور تحریک انصاف سے تعلق رکھتے ہیں اس لئے انہیں ہٹانے کا فیصلہ کیا گیا-ظہیر عباس کھوکھر رکن قومی اسمبلی بھی رہ چکے ہیں۔