سی پیک اتھارٹی ختم کرنے پر غور منصوبوں کیلئے سپیشل سیکرٹری کی تعیناتی ہوگی

اسلام آباد (ایجنسیاں )وزارت منصوبہ بندی کے حکام نے سینیٹ کمیٹی کو بتایاہے کہ سی پیک اتھارٹی ختم کرکے تمام معاملات پلاننگ کمیشن کو سونپے جا رہے ہیں‘سی پیک منصوبوں کیلئے اسپیشل سیکریٹری کی تعیناتی پر غور کیا جا رہا ہے‘ اتھارٹی کو ختم کرنے کے حوالے سے بل جلد پیش کیا جائیگا۔ تفصیلات کے مطابق سینیٹ کی قائمہ کمیٹی برائے منصوبہ بندی کے چیئرمین نے سی پیک اتھارٹی کے متعلق حتمی فیصلہ ہونے تک سی پیک اتھارٹی کے حوالے سے سینیٹر شیری رحمان، سینیٹر رضا ربانی اور سینیٹر عبدالقادر کے مجوزہ ترمیمی بلات پر کمیٹی کی کارروائی کو موخر کر دیا۔ سینیٹ کی قائمہ کمیٹی برائے منصوبہ بندی کا اجلاس چیئرمین کمیٹی سینیٹر سلیم مانڈوی والا کی زیر صدارت ہوا۔سینیٹر شیری رحمٰن کی طرف سے "چائنہ پاکستان اکنامک کوریڈور ( سی پیک ) اتھارٹی ( ترمیمی ) بل 2021 " کے عنوان سے پیش کردہ بل پر غور سے اجلاس کی کاروائی کا آغاز ہوا۔ وزارت کے حکام نے کمیٹی کو بتایا کہ وفاقی وزیر احسن اقبال کے وژن کے مطابق سی پیک اتھارٹی کو ختم کرتے ہوئے پروجیکٹ کے تمام تر معاملات پلاننگ کمیشن کو سونپنے اور پلاننگ کمیشن کے اندر سی پیک پروجیکٹ کیلئے اسپیشل سیکریٹری کی سطح پر ایک آفیسر کی تعیناتی پر غور کیا جا رہا ہے اور اس حوالے سے جلد فیصلہ کیا جائیگا۔ سی پیک اتھارٹی کو ختم کرنے کے حوالے سے قانون سازی کیلئے بل جلد پیش کیا جائیگا۔ سینیٹرز کی جانب سے پی ایس ڈی پی پروجیکٹس پر وزارت کو بھیجی گئی تجاویز پر عدم عملدرآمد پر بات کرتے ہوئے چیئرمین کمیٹی نے اپنے شدید تحفظات کا اظہار کیا۔کمیٹی نے گوادر پورٹ کے حوالے سے خصوصی رپورٹ تفصیلی غور کے بعد منظور کر لی۔