قوم حقیقی آزادی چاہتی ہے تو عمران خان کا ساتھ دے ، زین قریشی

ملتان(سٹاف رپورٹر)سابق وفاقی پارلیمانی سیکرٹری خزانہ و پاکستان تحریک انصاف جنوبی پنجاب کے سینئر نائب صدر زین حسین قریشی نے کہا ہے کہ عوام کوغلامی سے نجات دلانے اور حقیقی آزادی دلانے کا وقت آن پہنچا ہے۔ قوم اگر حقیقی آزادی چاہتی ہے تو اسے عمران خان کا ساتھ دینا ہوگا۔ عمران خان ملک کو فرسودہ اور کرپٹ نظام سے نجات دلانا چاہتے ہیں۔ اگر کوئی شخص خلوص نیت سے ملک اور قوم کی ترقی چاہتا ہے تو وہ عمران خان ہے۔ 20 مئی کو عوام ملتان پہنچ کر عمران خان کے ہاتھ مضبوط کریں۔ ان خیالات کا اظہار انہوں نے گزشتہ روز خانیوال میں 20مئی ملتان جلسے کے حوالے سے عوامی رابطہ مہم کے سلسلے میں تقریب سے خطاب کرتے ہوئے کیا۔ سینیٹر عون عباس بپی‘ پیر ظہور قریشی‘ احمد یار ہراج‘ معین ریاض قریشی‘ پیر مصدق شاہ‘ فیصل نیازی‘ مہر عمران پرویز ڈھول‘ مہندر پال سنگھ‘ چودھری خالد ارائیں و پی ٹی آئی عہدیداروں کی کثیر تعداد اس موقع پر موجود تھی۔ انہوں نے کہا امپورٹڈ حکمرانوں سے نجات اور فوری الیکشن ملک بھر کے کروڑوں عوام کی آواز ہے۔ حکمرانوں کو عمران فوبیا ہو چکا ہے۔ 13 جماعتیں ایک طرف اور عمران خان ایک طرف ہے ۔ فوری الیکشن نوشتہ دیوار بن چکے ہیں۔ اگر ملک کو بچانا ہے تو فوری الیکشن کروانا ہونگے۔ تقریب سے خطاب کرتے ہوئے سینیٹر عون عباس بپی نے کہا عمران خان کا20مئی کا ملتان کا جلسہ تاریخی ہوگا۔