نمکیات اور سیم و تھور آبپاش زمینوں کو متاثر کرنیوالے اہم مسائل

مخدوم رشید(نامہ نگار)سیکرٹری زراعت جنوبی پنجاب ثاقب علی عطیل نے کہا ہے کہ نمکیات اور سیم و تھور آبپاش زمینوں کو متاثر کرنے والے سب سے اہم مسائل میں سے ہیں۔ پاکستان میں 6.5 ملین ہیکٹر رقبہ شورزدہ ہے۔ کلراٹھے پن کی وجہ سے زرعی پیداواری صلاحیت میں سالانہ نقصان کا تخمینہ 31 ملین امریکی ڈالر ہے۔ کلراٹھے پن کی وجہ سے عالمی سطح پر ہر سال 1.5 ملین ہیکٹر زرعی زمین پیداوار سے باہر ہوتی ہے جس کی وجہ سے آنے والے دنوں میں فوڈ سیکورٹی کے مسائل پیداہوسکتے ہیں۔ ان خیالات کا اظہار انہوں نے اسلام آباد میں پاکستان کونسل آف ریسرچ ان واٹر ریسورسز کے زیراہتمام سلینیٹی پالیسی ریویو کے موضوع پر منعقدہ ورکشاپ کے شرکا سے خطاب کے دوران کیا۔ انہوں نے مزید کہا کہ پاکستان میں 2017 کے دوران سیم وتھور اور نمکیات کی وجہ سے فصلوں کی پیداوار کا نقصان 28.5 ملین ڈالر ہوا جبکہ کل سالانہ اقتصادی نقصان کا تخمینہ 300 ملین ڈالرلگایا گیا تھا۔ گندم ہماری خوراک کااہم جزو ہے۔ ملک کی معتدل نمکین زمینوں میں اس کی پیداوار کے نقصانات اوسطاً 65 فیصد ہیں۔