بھارتی گلوکار سدھو موسے والا کی آخری رسومات کے موقع پر جذباتی مناظر

01 جون ، 2022

نئی دہلی (جنگ نیوز ) بھارت کے معروف گلوکار سدھو موسے والا کی آخری رسومات کےموقع پر والدین اپنے جوان بیٹے کی لاش پربین کرتے رہے ۔دوسری جانب پولیس نے کیس میں من پریت سنگھ کو ریاست اتراکھنڈ سے اس کے پانچ ساتھیوں سمیت گرفتار کیا ہے۔بتایا جاتا ہے کہ یہ گلوکار کی قتل کی واردات میں پہلی گرفتار ی ہے، عدالت نے ملزم کو پانچ روزہ جسمانی ریمانڈ پر پولیس کے حوالے کردیا ۔آنجہانی گلوکار سدھو موسے والا کی بھارتی پنجاب ضلع منسا کے گاؤں میں آخری رسومات ادا کی گئیں اور اس موقع پر بھارت سمیت پاکستان میں بھی سدھو موسے والا کا نام ٹاپ ٹرینڈ میں شامل ہے۔سدھو موسے والا کی میت پر والدین کی متعدد جذباتی تصویریں اور ویڈیوز سوشل میڈیا پر وائرل ہو رہی ہیں جس مییں گلوکار کی والدہ کو بیٹے کی موت پر اپنے شوہر کے آنسو صاف کرتے دیکھا گیا۔دریں اثنا سدھو موسے والا کی پوسٹ مارٹم رپورٹ منظر عام پر آ گئی ہے جس میں بتایا جارہا ہے کہ اتوار کی شام قتل کیے جانے والے سدھو موسے والا 2 درجن سے زائد گولیوں کا نشانہ بنے۔پوسٹ مارٹم کے دوران سدھو موسے والا کے جسم سے 25 گولیاں نکالی گئی ہیں۔