مقبوضہ کشمیر ،دو مزید نوجوان شہید، 5 روز میں تعداد 17 ہوگئی

سرینگر (جنگ نیوز )مقبوضہ کشمیرمیں بھارتی فورسزنے ریاستی دہشتگردی کرتے ہوئے مزید 2 نوجوانوں کو شہید کردیا۔کشمیرمیڈیا سروس کے
مطابق بھارت کی قابض فورسزنے پلوامہ میں محاصرےکے دوران فائرنگ کرکے 2 نہتے کشمیری نوجوانوں کوشہید کردیا۔ کشمیر میڈیا سروس کے مطابق بھارتی فوج نے ایک ہفتے کے دوران فائرنگ کرکے 17 کشمیری نوجوانوں کو شہید کیا۔ منگل کو بھارتی فورسز نے سرینگر، کپواڑہ ،بارہمولہ و دیگر اضلا ع میں بھی سرچ آپریشن کیا اور متعدد افراد کو گرفتار کرلیا گیا، دوسری جانب بڈگام کے علاقے ہم ہمہ میں ایک بھارتی فوجی نے خودکشی کرلی ،اہلکار نے خود کو گلے میں پھندا لگا کر زندگی کا خاتمہ کیا، تفصیلات کے مطابق بھارتی فورسز نے گھروں میں گھس کرخواتین سے بدتمیزی کی اورمردوں کوتشدد کا نشانہ بنایا۔بھارتی فورسز کی دہشتگردانہ کارروائیوں کے دوران موبائل اورانٹرنیٹ سروس بند کردی گئی۔ گزشتہ ایک ہفتے کے دوران قابض بھارتی فوجی 17کشمیری نوجوانوں کو شہید کرچکے ہیں۔ دوسری جانب ضلع پونچھ میں بھارتی فوجی افسربارودی سرنگ کے دھماکے میں زخمی ہوگیا۔