اوور سیز پاکستانیوں کی ووٹنگ کا معاملہ، درخواست واپس

اسلام آباد ( آن لائن ) اوورسیز پاکستانیوں کیلئے ووٹنگ کے طریقہ کار میں تبدیلی کیخلاف درخواست واپس لے لی گئی۔ کیس کی سماعت اسلام ہائیکورٹ کے چیف جسٹس اطہر من اللہ نے داؤد غزنوی ایڈووکیٹ کی درخواست پر سماعت کی۔ دوران سماعت چیف جسٹس نے ریمارکس دیئے کہ پارلیمنٹ کو اپنا کام کرنے دیں، ابھی تو آپ کی پٹیشن قبل از وقت ہے۔ چیف جسٹس نے وکیل سے استفسار کیا کہ کیا پچھلے الیکشن میں اوورسیز پاکستانیوں نے پوسٹل بیلٹ کے ذریعے ووٹ کا حق استعمال نہیں کیا؟کیا سات ہزار پاکستانیوں نے پوسٹل بیلٹ کے ذریعے ووٹ کاسٹ نہیں کیے تھے؟ جس پر درخواست گزار کے وکیل عارف چوہدری نے عدالت کو بتایا کہ 1993 میں سپریم کورٹ کے کہنے پر کام شروع ہوا تھا یہ کام 30 سال میں ہوا تھا جسے واپس کر دیا گیا،عدالت سمجھتی ہے کہ ترمیم سے اوورسیز پاکستانیوں کے حقوق متاثر نہیں ہوئے آئین کا احترام کرنا چاہئے جس پر عدالت نے کہا کہ پارلیمنٹ نے اس معاملے کو دیکھنا ہے،ابھی تو آپکی پٹیشن قبل از وقت ہے، صدر نے معاملہ واپس بھیج دیا ہے جب ترمیم ہی نہیں ہوئی تو عدالت کیسے فرض کر سکتی ہے؟ عین ممکن ہے جو آپ کہہ رہے ہیں پار لیمنٹ اس پر نظر ثانی کرلے، ابھی تو آپ نے بل کو چیلنج کیا ہے ترمیم تو ہوئی ہی نہیں ہے کیا یہ کورٹ پارلیمنٹ سے اختیارات واپس لے لے؟ جب ترمیم ہو جائے تو درخواست گزار درخواست فائل کر سکتا ہے، امریکا میں 13 ریاستیں ہیں جو اوورسیز امریکیوں کو ووٹ کا حق نہیں دیتی جس پر درخواست گزار کے وکیل نے عدالت کو بتایا کہ میں فی الحال درخواست واپس لے رہا ہوں مگر عدالت آرڈر میں لکھے کہ دوبارہ دائر کرنے کا حق محفوظ رکھتا ہوں۔