ملکی کاروباری حالات دن بدن خراب ہوتے جا رہے ہیں ،نوید اقبال

ملتان (سٹاف رپورٹر)ایوان تجارت و صنعت ملتان کےسینئر وائس پریذیڈنٹ سہیل طفیل اور وائس پریذیڈنٹ نوید اقبال چغتائی نے بجلی کے بڑھتے ہوئے ٹیرف ،پٹرولیم مصنوعات کی قیمتوں میں اضافہ اور صنعتی شعبہ کو گیس کی عدم دستیابی پر اظہار خیال کرتے کہا ہے کہ ملک میں کاروباری حالات دن بدن خراب ہوتے جا رہے ہیں جس سے صنعتی شعبہ کے لئے بھی مشکلات بڑھ گئی ہیں۔ بجلی اور پیٹرولیم مصنوعات کی قیمتوں میںاضافہ سے خام مال کی قیمتوں میں بھی آئے روز اضافہ ہو رہا ہے اس کے ساتھ ساتھ انڈسٹری کیلئے گیس کی دستیابی کا مسئلہ بھی درپیش ہے۔ پیٹرولیم مصنوعات کی قیمتوں میں دو مرحلوں میں60 روپے لیٹر کا اضافہ سے مہنگائی کا گراف اور بلند ہو جائے گا ۔ ان حالات میں صنعتی یونٹ کو چالو رکھنا بہت مشکل ہوگیا ہے اور کارخانے،فیکٹریاں بند ہو رہی ہیں۔یکم جولائی 2022 سے بجلی کے ٹیرف میں مزید اضافہ کیا جا رہا ہے جس کے نتیجہ میں فی یونٹ پچیس روپے کا ہو جائے گا۔اس اضافے کو مسترد کرتے ہیں۔ اس سے صنعتی شعبہ کو ناقابل تلافی نقصان پہنچے گا پاکستانی مصنوعات عالمی منڈیوں میں مقابلے کی دوڑ سے باہر ہو جائیں گی اور ایکسپورٹ میں اضافہ کی بجائے اس میں کمی کا سامنا کرنا پڑے گا۔