حکمران ڈمی، پارلیمنٹ میں اپوزیشن نہیں، ملکی فیصلے IMF کر رہا ،سراج الحق

لاہور(نمائندہ خصوصی)امیر جماعت اسلامی سراج الحق نے کہا ہے کہ حکمران ڈمی، پارلیمنٹ میں اپوزیشن موجود نہیں، ملکی فیصلے آئی ایم ایف کر رہا ہے۔ اگر بجٹ میں ملکی معیشت کو سود فری اور مہنگائی ختم کرنے کے اقدامات نہ اٹھائے گئے تو ہم اگلے ہی روز سڑکوں پر ہوں گے۔حکومت غیر ترقیاتی اخراجات اور وی آئی پی کلچر کا خاتمہ کرے۔جاگیرداروں اور وڈیروں پر ٹیکس نافذ کیے جائیں۔ ان خیالات کا اظہار انہوںنے منصورہ میں قائدین جماعت سے گفتگو کرتے ہوئے کیا۔ انہوں نے کہا کہ جماعت اسلامی آئی ایم ایف کے ایما پر پٹرول، بجلی، گیس کی قیمتوں میں اضافے کو یکسر مسترد کرتی ہے۔ ملک کی دولت لوٹنے والوں کا کڑا احتساب ہونا چاہیے۔ حکمرانوں نے اپنی کرپشن بچانے کیلئے نیب کو ختم کیا۔ سپریم کورٹ سے اپیل کرتے ہیںکہ پاناما لیکس اور پنڈوراپیپرز میں ملوث افراد کا احتساب کرے۔میثاق معیشت وقت کی ضرورت ہے،گرینڈ ڈائیلاگ کی بات جماعت اسلامی گزشتہ ایک ماہ سے کر رہی ہے،اگر تمام سیاسی جماعتیں ایک جگہ نہ بیٹھی تو مزید نقصان ہو گا۔ قوم سے اپیل ہے کہ وہ انتخابات میں ترازو پر اعتماد کا اظہار کرے۔امیرجماعت نے کہا کہ قوم پر مسلط نااہل حکمرانوں کی وجہ سے 7کروڑ سے زائد افراد غربت کی لکیر سے نیچے زندگی گزارنے پر مجبور ہیں۔