سینٹ ، اپوزیشن کا گیس کی قیمتوں میں اضافے پر شدید احتجاج

اسلام آباد (نمائندہ جنگ)سینٹ میں اپوزیشن نے گیس کی قیمتوں میں 45فیصد اضافہ کرنے پر شدید احتجاج کیا اور کہا کہ پٹرولیم مصنوعات اور بجلی کی قیمتوں میں اضافہ کے بعد امپورٹڈ حکومت نے معاشی گولہ باری جاری رکھتے ہوئے گیس کی قیمتیں بھی بڑھا دی ہیں ، قائد حزب اختلاف ڈاکٹر شہزاد وسیم نے پیر کوانتہائی عوامی اہمیت کے معاملہ پر بات کرتے ہوئے کہا کہ پٹرول کی بوسٹر ڈوز ابھی آنی ہے ، حکومت نے غلامی قبول کی مگر ہر روز اس قوم کو اس کی قیمت ادا کرنا پڑتی ہے ، عوام کو پکڑ کر آئی ایم یف کے بیلنے میں دے دیا ہے ،ظلم یہاں ختم نہیں ہوتا عوام کی ہڈیوں کا نچوڑا پیسہ انکی ذاتی تشہیر پر خرچ ہو رہا ہے ،موجودہ حکمرانوں کو عمران فوبیا ہوا ہے، ان کے بیان اٹھائیں سوائے عمران خان کے ان کے منہ سے دوسرا لفظ ہی نہیں نکلتا، عمران کو گرفتار کرنے کی بجائے مہنگائی ، کرپشن، گیس اور پٹرول کی قیمت کو گرفتار کریں، منی لانڈرنگ والوں کو گرفتار کریں ، اس دوران حکومت اور اپوزیشن کی طرف سے ارکان کھڑے ہو گئے اور بولنا شروع کر دیا ، اپوزیشن لیڈر نے بغیر مائیک کے ہی زور سے بولنا شروع کر دیا، قائد ایوان اعظم نذیر تارڑ نے کہا کہ ایسے نہیں چلے گا ، اس ایشو پر یہ بات کر چکے، ہائو س کا ماحول خراب نہ کریں ، ہائوس کو طریقے سے چلنے دیں یہ طریقہ درست نہیں کہ صرف پارٹی لیڈر کو خوش کرنے کیلئے ایسے کیا جائے ،چیئرمین سینٹ اپوزیشن کو بیٹھنے کیلئے کہتے رہے ، قائد ایوان نے کہا کہ پہلے انگوٹھیوں کا حساب دیں ، پورا میڈیا بھرا پڑا ہے ، پہلے فرح گوگی کی کرپشن کا حساب تو دیں ، شہزاد اکبر کے اربوں روپے کا حساب دیں ، یہ کس منہ سے باتیں کرتے ہیں ، اس طرح کیسے ہائوس چلے گا ،اپنی کرپشن کی بات ہوتی ہے تو چیخنا شروع ہو جاتے ہیں ،دامن ان کا تار تار ہے ، معیشت کا انہوں نے برا حال کیا۔